שטייענדיג נאך די שוידערליכע טראגעדיע וואס האט פאסירט היינט אין ירושלים עיה"ק, ווען צוויי קליינע קינדערלעך זענען ליידער נפטר געווארן, און נאך צענדליגע זענען פארוואונדעט געווארן צוליב א אומקלארע פארפעסטיגונג אין א געביידע, הערט מען ליידער אז די מדינת ישראל אינסטאנצן פארלאנגען צו שניידן די נפטרים רח"ל וועלנדיג געוואויר ווערן די אורזאך פון די טרויעריגע געשיכטע.
די פאליציי האט אריינגעגעבן א פארלאנג אין געריכט צו קענען דורכפירן זייערע בייזוויליגע פלענער, און ליידער האט עס די געריכט באשטעטיגט טראץ די קלארע קעגנערשאפט פון די עלטערן. מאמענטאל הייסט עס אז מארגן אינדערפרי וועלן אדוואקאטן אריינגעבן אן אפיעל צו א העכערע געריכט, אין די צייט וואס אידישע קינדער זענען מתפלל שלא ירעו ולא ישחיתו בכל הר קדשי.
אידישע קינדער יראים ושלמים וואס זענען אויפגעשוידערט פון די שרעקליכע פלענער דורכצופירן ניתוחי מתים, זענען ארויסגעקומען אין די מאסן יעצט ביינאכט מוחה זיין כדת של תורה, די קלארע הוראת הקודש פון די גדולי הדור איז געווארן איבערגעגעבן פון די חברי ביד"ץ העדה החרדית, ובראשם מרן פוסק הדור מרא דארעא קדישא שליט"א, וועלכער האט געזאגט אז עס איז א חוב אויף יעדן איינעם ארויסצוגיין מוחה זיין ברחובה של עיר, מיטן האפענונג דאס צו קענען אפשאפן מיטן אויבערשטנס הילף.
