מיט גרויס צער ווערט היינט אויפגענומען די ביטערע בשורה אז עס איז נפטר געווארן אחד מגדולי חשובי האדמורי"ם אינעם עיר ואם בישראל בארא פארק, כ"ק הרה"צ רבי יעקב יהוסף ראטטענבערג זצ"ל אדמו"ר מקאסאן, וועלכער האט אנגעפירט זיין שיינעם הויף ביי די ניינטע עוועניו און משפיע געווען מהוד תורתו וצדקתו אויף פילע אידן חסידים ואנשי מעשה.
דער רבי זצ"ל איז געווען דער איינציגסטער זון פון כ"ק אדמו"ר הרה"ק רבי אשר ישעי' ראטטענבערג זצ"ל מקאסאן, וועלכער האט געוואוינט באחרית ימיו אין בני ברק און איז נפטר געווארן מיט ארום פופצן יאר צוריק. א זון פון הרה"צ רבי משה שמואל מקאסאן זצ"ל, א זון פון הרה"ק בעל שמועה טובה מקאסאן זצ"ל, א זון פון הרה"ק רבי יהוסף מקאסאן זצ"ל בעל בני שלשים.
דער רבי זצ"ל האט געצויגן א הערליכע יחוס צו פילע צדיקים וקדושים לבית זידטשויב קאמארנא און טאהש, און איז געווען אן איידעם ביי הרה"צ רבי מנחם מענדיל רובין זצ"ל האדמו"ר מקערעסטיר, אן אייניקל פון הרה"ק רבי ישעי'לע קערעסטירער זי"ע און נאך פילע צדיקים.
מיט א זעלטענע ענוות חן און הצנע לכת האט דער רבי געדינט דעם אויבערשטן און געהארעוועט אין לערנען יומם ולילה, דער רבי האט מרביץ תורה געווען פאר תלמידים און געדינט אלס מלמד תשב"ר פאר לאנגע יארן אין די בעלזא תלמוד תורה אין בארא פארק. מיט א ווארעמע שמייכל און ליבליכקייט האט דער רבי דערהויבן זיינע תלמידים און אריינגעברענגט אין זיי חיות דקדושה, לעכטיגע תקופות וואס איז געבליבן איינגעקריצט ביי אלע תלמידים.
ביים ווינקל פון די פופציגסטע סטריט און די ניינטע עוועניו אין בארא פארק האט דער רבי געפירט דעם שיינעם בית המדרש על דרך אבותיו הקדושים, געדאווענט די הייליגע תפילות בהשתפכות הנפש און משפיע געווען אויף די חסידים ומעריצים. ליידער איז אבער געווען די לעצטערע יארן א בחינה פון ספר תורה שרוי בצער, ווען דער רבי האט זיך שרעקליך געמוטשעט מיט מערערע יסורים ומכאובים רח"ל.
היינט ערב שבת קודש ה' שבט פארמיטאג איז דער רבי נסתלק געווארן לגנזי מרומים, צום טיפן צער פון די מקורבים און חסידים און די בני המשפחה, די לוויה וועט פארקומען עלף דרייסיג פארמיטאג מבית מדרשו אויפן וועג קיין מאנסי, וואו דער רבי וועט געברענגט ווערן למנוחת עולמים אויפן בית החיים הר שלום אין מאנסי.
דער רבי זצ"ל לאזט איבער א הערליכע דור, חשובע קינדער און אייניקלעך זרע ברך השם, די זיהן הרה"ג ר' ישכר בעריש ראטטענבערג שליט"א איידעם ביי הגה"צ אבד"ק לובלין ב"פ שליט"א, הרה"ג ר' משה שמואל ראטטענבערג שליט"א איידעם ביי הגה"צ אבד"ק אוהעל וומס"ב שליט"א, הרה"ג ר' חיים שלמה ראטטענבערג שליט"א איידעם ביי כ"ק אדמו"ר מחוסט שליט"א פון ב"פ, הרה"ג ר' ברוך זאב ראטטענבערג שליט"א איידעם ביי הגה"צ אבד"ק לאנצוהט וומס"ב שליט"א, הרה"ג ר' מנחם מענדיל ראטטענבערג שליט"א און הרה"ג ר' ישראל צבי דוד ראטטענבערג שליט"א. די איידימער זענען הרה"ג ר' אהרן שפיגל שליט"א בן כ"ק אדמו"ר מאסטראוו קאלושין זצ"ל, און הרה"ג ר' מרדכי צבי מייזליש שליט"א בן הגה"צ גאב"ד סיגעיט שליט"א.
די געשוויסטער פונעם רבי'ן זצ"ל זענען, הרבנית מקאסאן תליט"א אשת חבר כ"ק אדמו"ר מקאסאן שליט"א, הרבנית אשת חבר הגה"צ רבי אליעזר שלמה שיק זצ"ל אבד"ק היכל הקודש ברסלב, הרבנית אשת חבר הגה"צ ר' יעקב פרץ פריעדמאן זצ"ל אבד"ק טענקא ירושלים, הרבנית אשת הגה"צ אבד"ק מילדוי שליט"א, און הרבנית אשת הרה"ג ר' משה דוד האלפערט שליט"א.
