תושבי קרית יואל ומחוזותיה גרייטן זיך מיטצוהאלטן א ערשטמאליגע ראחמיסטריווקא שבת וואס וועט געפראוועט ווערן אינעם קרית יואל'ער אומגעגנט, ווען כ"ק אדמו"ר מראחמיסטריווקא מאנסי שליט"א וועט פראווענען דעם קומענדיגן שבת קודש פרשת תרומה אין שכונת חתם סופר אין קרית יואל, די וואודבארי דזשאנקשען געגנט וואס איז שטארק באוואוינט מיט היימישע אידן.
דער רבי שליט"א וועלכער פירט אן זיין שיינעם הויף און די ישיבה אהבת התורה ראחמיסטריווקא אין מאנסי, וועט ארויספארן אויף א געהויבענע באזוך קיין קרית יואל צו אויפטרייבן שיינע סכומים לטובת מוסדותיו הקדושים, און גלייכצייטיג משפיע זיין אויף די תושבי העיר, איבערהויפט די תושבי השכונה אין וואודבארי דזשאנקשען, וואס האבן געלאדנט דעם רבי'ן צו קומען פראווענען א שבת בתוככי העיר.
די שבת איז באשטימט אויף קומענדיגע וואך פרשת תרומה, די ערשטע שבת אין חודש אדר, דער רבי וועט שוין מופיע זיין בשערי העיר דאנערשטאג בעפאר, און באשיינען א גרויסע מעמד קבלת פנים מיט די באטייליגונג פון פילע תושבי העיר און חשובע רבנים, אזוי אויך וועט דער רבי פארלערנען די וועכנטליכע שיעור ליל שישי אין אור החיים הק' מתובל מיט סיפורי צדיקים.
שבת קודש וועט דער רבי פראווענען די תפילות און טישן אין ביהמ"ד פראנקפורט אין אין ביהמ"ד אור משה, און מוצאי שבת קודש וועט פארקומען א גרויסארטיגע מלוה מלכה אין די נייע פראכטפולע ציעשנובער בית המדרש אין קרית יואל, וואו עס איז ערווארטעט א גרויסן ציבור תושבי העיר רבנן ותלמידיהון.
