אין די צייט וואס כ"ק אדמו"ר מקרעטשניף כפר עטה שליט"א געפונט זיך צוגאסט אין ניו יארק און איז משפיע אויף פילע אידן וואס קלאמערן זיך לאורו, איז היינט באשטעטיגט געווארן אז דער רבי וועט פראווענען א געהויבענע שבת אינעם עיר ואם בישראל בארא פארק, וואו די תפילות און טישן וועלן פארקומען אויף א גרויסע פארנעם במעמד קהל רב.
דער רבי שליט"א וועלכער האט אנגענומען דעם כתר האדמורו"ת מיט עטליכע חדשים צוריק, נאכן הסתלקות פון אביו הגדול כ"ק אדמו"ר מקרעטשניף סיגעט זצ"ל בעל רזא דאמונה, איז פארלאפענע וואך אנגעקומען אויפן ערשטן באזוך אלס רבי אין ניו יארק, צו באשיינען די שמחת החתונה בבית אחיו הגדול כ"ק אדמו"ר מקרעטשניף סיגעט וומס"ב שליט"א וואס איז פארגעקומען נעכטן דינסטאג אין מאנסי.
אין לויף פון די לעצטערע טעג האט דער רבי געפראוועט א רייע מסיבות און מעמדים מיט די חסידים ומעריצים, אריינגערעכנט א געהויבענע שבת אין די עירמאונט געגנט אין מאנסי וואו הונדערטער אידן האבן זיך געקלאמערט און געווייקט ביי די תפילות און טישן.
אצינד איז באשטעטיגט געווארן אז דעם קומענדיגן שבת קודש פרשת תרומה וועט דער רבי פראווענען אויף א גרויסע פארנעם אין שטאט בארא פארק, וואו עס וועט זיין א געלעגנהייט פאר חסידיו ומעריציו תושבי העיר, וואס וועלן קענען מיטהאלטן די תפילות און טישן. דעם גאנצן שבת וועט געפראוועט ווערן אין זאל פון אנשי ספרד, און די אכסניא וועט זיין אין שטוב פון הנגיד החסיד ר' קלמן אייזדארפער הי"ו.
