נעכטן דינסטאג ביינאכט ביים גרויסן שמחת השבע ברכות בחצר הקודש סקווירא, אין ביהמ"ד הגדול אין שיכון סקווירא, איז געמאלדן געווארן די נייעס פאר כלל חסידי סקווירא, איבער די גרינדונג פון א נייע אפטיילונג אינערהאלב די בית הוראה אין שטעטל, די נייע אפטיילונג "מצויינים בהלכה" וועט פארשטעלן ספעציעלע דיינים מומחים אין פארשידענע מקצועות, צו קענען העלפן די חברי הקהילה ותושבי השיכון מיט זייער עקספערטיז אין א ספעציעלן געביט.
די מעלדונג איז געווארן אויסגערופן דורך הרב החסיד ר' מענדיל בערגער הי"ו מראשי הקהילה אין שיכון סקווירא, און א חבר ההנהלה פון די בית הוראה, וועלכער האט איבערגעגעבן דעם ברכת הקודש פון כ"ק אדמו"ר מסקווירא שליט"א צום גרינדונג פון די נייע מסגרת "מצויינים בהלכה", אין צוגאב צו די געטרייע רבנים ודיינים וואס שטייען גרייט אויף טריט און שריט ארויסצוהעלפן דעם גאנצן ציבור.
אונטער די נייע מסגרת איז געווארן אויפגענומען אכט חשובע אינגעלייט תלמידי חכמים מובהקים, וואס זענען אויסגעקאכט אין א ספעציפישע נושא צו קענען ענטפערן דעם דבר ה' זו הלכה, יעדער אין זיין באזונדערע מקצוע, און צוביסלעך וועט מען אויפנעמען נאך אינגעלייט צו קענען ענטפערן אויף נאך ספעציעלע מקצועות.
די אכט פרישע דיינים זענען ווי פאלגענד, הרב אברהם משה בנימין זילבערמאן שליט"א - אויף הלכות אונאה ומקח טעות, הרב שמואל בנימין הורוויץ שליט"א – אויף הלכות ערבות, הרב אהרן שטערן שליט"א – אויף הלכות ריבית, הרב ברוך שפירא שליט"א – אויף הלכות שכירות וקבלנות בשבת, הרב מרדכי פינחס גרינוואלד שליט"א – אויף הלכות עירובין , הרב ברוך ראובן יוסף אוסטערליץ שליט"א – אויף הלכות חלה, הרב שמואל לונגער שליט"א – אויף הלכות רפואה בשבת, און הרב יושע העשיל פעלדמאן שליט"א – אויף הלכות מזוזה.
נאך די הכרזה ביים צענטראלן שמחת השבע ברכות, זענען די אכט דיינים מומחים ארויפגערופן געווארן אויפן בימת הכבוד, וואו כ"ק אדמו"ר מסקווירא שליט"א האט געוואונטשן לחיים און זיי ווארעם אנגעוואונטשן הצלחה און סייעתא דשמיא אויפן נייעם תפקיד.
