די הנהלה פון בית חינוך לבנות "מסורת מרים" אין שטאט מאנסי, א מיידל שולע וואו עס ווערן נתחנך הונדערטער תלמידות על דרך ישראל סבא, האט היינט געמאלדן די געוואלדיגע אנטוויקלונג אינערהאלב די רוחניות'דיגע שטאנדפונקט פונעם מוסד, אז די רוחניות'דיגע הדרכה והשקפה וועט פון היינט אן שטיין אונטער די פערזענליכע באגלייטונג פון צוויי חשובע פראמינענטע אדמורי"ם אין שטאט, כ"ק אדמו"ר מסקווירא מאנסי שליט"א, און כ"ק אדמו"ר מראחמיסטריווקא ס"וו שליט"א.
די מיידל שולע איז געגרינדעט געווארן מיט עטליכע יאר צוריק דורך א גרופע אינגעלייט וואס האבן געזעהן די נויט פון אזא סארט מיידל שולע וואו צו קענען מחנך זיין די קינדערלעך על דרך ישראל סבא, ביז היינט איז נישט געווען קיין פולשטענדיגע תורה'דיגע אויטאריטעט אינעם מוסד, ווען אלע רוחניות'דיגע שאלות האט מען אנגעפרעגט די רבני העיר, אצינד איז געמאלדן געווארן אז די הנהלת המוסד האט אויפגענומען א פולשטענדיגע תורה'דיגע אויטאריטעט צו באגלייטן די אנטוויקלונגען מיטן קלארן דעת תורה.
צום דעם צוועק האט די הנהלת המוסד זיך געוואנדן צו צוויי פראמינענטע אדמורי"ם אין שטאט וואס זענען באקאנט מיט זייער קלארע דעת תורה און זענען טאג טעגליך פארנומען צו ענטפערן שאלות פאר אידישע קינדער, סיי בעניני חינוך און סיי אין אלע ענינים ברוחניות ובגשמיות, כ"ק אדמו"ר מסקווירא מאנסי שליט"א, און זיין פלומעניק כ"ק אדמו"ר מראחמיסטריווקא שליט"א פון ספרינג וואלי, די צוויי אדמורי"ם וועלכע האלטן אן א נאנטע קשר צווישן זיך האבן פארגעלייגט די יסודות און אנגענומען דעם תפקיד ההדרכה צו זעהן אז די מוסד ווערט געפירט אויפן ריכטיגן שטייגער על דרך ישראל סבא, א שריט וואס האט צוגעברענגט גרויס פרייד ביי די הורי המוסדות און תושבי העיר.
