זעלטענער צוזאמענשוועלץ פון צוויי עולמות אונטערן זעלבן דאך מיטן שידוך שליסען פון ווארימע חצר הקודש מיט שארפע מבצר התורה.
קאליפארניע – ענבי הזיסע גפן בענבי הטרוקענע גפן דבר נאה! מיט רגשי שמחה האבן חסידים ואנשי מעשה ובני הישיבות איבער דער גארער וועלט אויפגענומען די בשורה איבער דעם פארצווייגטן שידוך געשלאסן געווארן בשעטומ”צ, וואס פאראייניגט די צוויי כוסות המלוכה, עולם החסידות והישיבות כאחד: חצר הק׳ גִּ׳ינֶעסס און ישיבת בַּאֲלַאנְס, אקסנארד.
אלס מחותן מצד החתן המופלג נצר מטעים שתולים הטוב ומטיב מלא וגדוש הח׳ זוּסמַאן נ"י באשיינט אב״ד גִּ׳ינֶעסס שליט"א קאליפארניע,וועלכער פירט זיין עדה מיט א זיסקייט און חסידישע ארומה, דולה ומשקה זיינע חסידים בפרי עץ הגפן.
מצד הכלה המהוללה כגפן פורחת זִיסָא תחי׳ שטייט המשגיח מִבַּאֲלַאנְס שליט"א פון אקסנארד. מפורסם מיט זיין חריפות און הנהגה ישרה.
דער געהויבענער מעמד התנאים איז פארגעקומען אין שאטוי ד׳ארנוי זאל. חסידים ומעריצים זענען געקומען פון אלע עקן וועלט מיטצוהאלטן די טשיקאווע שמחה. ווי אויך א שיינעם אויוון-אן פון גדולים וועלכע זענען געקומען טרינקען לחיים, והשתי׳ כדת משה וישראל.
מיט'ן ליינען די תנאים איז נתכבד געווארן האדמו״ר מִמֶּערְלָאט שליט״א, וואס האט עס פארגעליינט מיט א זעלטענער געלאסענע טאָהן כמנהגם. דברי ברכה האט מען געהערט פון די זיידעס הגאונים שליט"א: ראש ישיבת שַׁארְדּוֹנֵי, ר״י סָאבִיּוֹן, און דומ״ץ סֶעמִי-סְוִויטֶע, וועלכע האבן ארויסגעברענגט די פּאר פונעם פּערפעקט שידוך.
באזונדער כבוד איז אפגעגעבן געווארן פארן רבנית פִּינְקָא רויזא תליט״א, א בתש״ק פון די מוסקאט ליניע.
דערנאך האט זיך דער עולם ארויסגעלאזט אין א פייערדיגן טאנץ ״סימן טוב ס׳איז א טרוקען שידוך! ומזל טוב ס׳איז א זיסע שידוך!״ וואס האט אנגעהאלטן פאר לאנגע שעה’ן.
צווישן די הונדערטער באטייליגטע, האבן זיך ארויסגעזוכט הנהלת המוסדות וראשי הקהילה: ר׳ משה מאיר בראנדוויין יו"ר ועד "נטיעות קודש", און הנה"ח באראן הרזוג פטרון הכרמים והיקבים. ר׳ משה מאיר האט אויסגעדריקט אז נאר דא אין קאליפארניע קען זיך שאפן א שידוך צווישן צוויי עקסטרעמעס. ס׳איז די פערפעקט קלימאט פאר אזא מיזוג.
די שדכנים זענען געווען הנגיד ר׳ זוסיא צוקערמאן ומחותנו מיסטער ביטערספעלד. זיי האבן זיך ארויסגעשטעלט אלץ מומחים אין פערפעקטלי באלאנצירן דעם קאלטן טרוקענע (עס פעלט דא א ווארט?) טעם לעומת די זיסן חסידישן זעליגקייט.
אויך האט זיך אנגעזען דער טרעזשורער פונעם קלויז קלמן קאָרק, דער חותם בטבעת וועלכער שליסט די קניינים בבחינת חתוּם וסתּום, און נציגי החצר: העסקן מאָטקע פערמענטער, וואס ברענגט אריין א תסיסה וחיוניות מיט זיין עבודת הקודש משים לילות כימים.
א באזונדערע מחזה הוד איז געווען דעם שילוב פון זקני החסידים וצעירי הצאן: הישיש ר׳ אלתר אלטמאן בבחינת יין ישן, מיט זיין חתנו כבנו קנקן חדש ר׳ זעליג יונג. דער יונגער ר' זעליג האט איבערגע׳חזר׳ט דעם באקאנטן ווארט פונעם אלטן ר' אלתר: "בעסער א הייסע ליטוואק ווי א קאלטע חסיד," ארויסברענגנדיג דעם ברען פון די באלאנס-ישיבה תלמידים פאראייניגט מיט דער ווארימקייט פון ג'ינעסס.
דער מעמד האט דערגרייכט א הויכפּונקט ווען אב״ד גִּ׳ינֶעסס האט ווארימערהייט ארומגענומען די זיסע חתן בעת זיין מחותן בּאַלאַנס משגיח שליט״א איז געשטאנען טרוקען מצדו השני. און אומגעראכטענהייט פראקלאמירט א נייע איניציאטיוו צו פארגיכערן ישועות פאר אידישע קינדער וואס ווארטן אויף זייער זיווג הגו מיט'ן לאזונג: משנכנס יין מרבים בשמחות.
דער רב האט מיט התלהבות אויסגערופן ״אָז יִמָּלֵא שְׂחוֹק פִּינוּ״ די צייט איז געקומען צו עפענען די מיילער דורך רעדן שידוכים, וואס דאס ברענגט נענטער די שמחה השלימה. פלאכטענדיג א הערליכן נוטריקון וואס שטאמט לכא׳ פונעם חת״ס: ענבים, איז עוד בית נבנה יבוא משיח.
דער רבי האט דאן געמאלדן אז די פרטים פון די נייע השתדלות וועלן נתגלה ווערן לכבוד שבת זכור. ״א צייט ניט נאר פאר 'פרשת זכור', נאר אויך פאר 'זכור פרשת' צו געדענקען די וואס זענען בפרשת שידוכים."
"עס מאכט נישט אויס," האט דער רבי ממשיך געווען מיט זיין פלאמיגן קול, "צי מען איז אלט אדער יונג, זיס אדער טרוקען, חסידיש, ליטוויש, מזרח׳יש, ספרד׳יש, 'טובים היינים מן האחד'! יעדער מענטש פאר זיך איז נאר א פלג גופא, אבער אינאיינעם אז מען האט אן עזר כנגדו קען מען זיך משלים זיין ווי א פערפעקטע הארמאניע צו א ניגון און ווי א וואויל-באלאנסירטע כוס ג׳ינעסס יין.״
די משוררים המפורסמים ר' יונתן גרין ור' יוסי שווארץ האבן אויסגעבראכן מיט א טרעפליכן ניגון: ״ענבים ענבים, הגיע זמן גאולתכם!", וואס האט מיטגעשלעפט דעם עולם אין א ריקוד של שמחה צום ניגון ״סימן טוב ס׳איז א פּערפעקט שידוך״ פונעם אומפארגעסליכן ר׳ מיכאל ע״ה.
בלייבט איבער צו וואונטשן: אז די מיזוג זאל עולה יפה זיין!
איבערצוגעבן מזל טוב וואונטשען רופט 718.360.9110
די אויבן אן ביי שמחת ג׳ינעסס באלאנס
אב״ד ג׳ינעסס ווינטשט זיס למחותנו דעם טרוקענע משגיח באלאנס
ראש הקהל בארון הרצוג ווינטש לחיים פאר אב״ד ג׳ינעסס
