מיט קארגע פיר און צוואנציג שעה פארבליבן גרייטן זיך פילע איינוואוינער אינעם עיר ואם בישראל בארא פארק צו מיטהאלטן א געהויבענע רעבישע חתונה אין שטאט, ווען כ"ק אדמו"ר מאמשינאוו ארה"ב שליט"א וועט אונטערפירן צו די חופה בתו החשובה הכלה שתחי', מיט די חתן א זון פון הגה"צ ר' מאיר ישראל בראנדוויין שליט"א, זון פון כ"ק אדמו"ר מסטרעטין שליט"א, און איידעם ביי הגה"צ אבד"ק דראהביטש שליט"א.
די גרויסע שמחה ווערט געפראוועט עטליכע יאר נאך וואס דער רבי שליט"א האט זיך געצויגן קיין בארא פארק צו ממלא זיין מקום אביו און אנפירן דעם שיינעם הויף פון חסידי אמשינאוו, וואו זיין גרויסן זיידן הרה"ק רבי איציק'ל אמשינאווער זצ"ל האט געפראוועט די עבודת הקודש און משפיע געווען פאר אידישע קינדער, און דערנאך בנו ממלא מקומו כ"ק אדמו"ר מאמשינאוו זצ"ל וועמענס פלאץ דער רבי האט ערפילט נאך זיין הסתלקות אין חודש ניסן תש"פ.
זינט דער רבי שליט"א האט איבערגענומען די כתר האדמורו"ת און ווערט פאררעכנט אלס איינער פון די חשובע אדמורי"ם אין בארא פארק, איז נאכנישט אויסגעקומען אז דער רבי זאל פראווענען א שמחה במעון קדשו בעיר מושבו אין בארא פארק, נאך וואס די פריערדיגע חתונה איז פארגעקומען אין ארץ ישראל במקום מגורי הכלה.
אצינד גרייט מען זיך צום ערשטן אמשינאווער חתונה אין בארא פארק בחצר הקודש פונעם רבי'ן, אנגעהויבן מיט די שמחת החתונה מארגן מאנטאג אין די זאלן פון תפארת רבקה, ביז נאך דעם קומענדיגן שבת של שמחה שבת פרשת תצוה, ווען דער רבי וועט פראווענען דעם שבת שבע ברכות בבית מדרשו, און די טישן אין די זאלן פון אנשי ספרד.
