די אידישע געמיינדע אין לאנדאן ענגלאנד איז טיף צושוידערט נאך די שרעקליכע ארסאן אטאקע וואס האט זיך אפגעשפילט די נאכט, ווען בייזוויליגע פארשוינען האבן אונטערגעצינדן פיר הצלה אמבולאנסן ביי די גאלדערסגרין הצלה הויפטקוואטיר.
די שרעקליכע פאסירונג האט זיך אפגעשפילט נאך האלבע נאכט ביי די הצלה הויפטקוואטיר אויף הייפיעלד ראוד אין גאלדערסגרין, ווען ארומיגע איינוואוינער האבן מיטאמאל געזעהן אלע פיר הצלה אמבולאנסן וואס זענען געווען פארקירט אינדרויסן פון די הצלה געביידע, טאטאל איינגעהילט אין העלישע פלאמען, אלע פיר אמבולאנסן זענען פארניכטעט געווארן אין די פייער, און מינוטן דערויף איז קלאר געווארן אז עס איז בייזוויליג געווארן אונטערגעצינדן, מיט קלארע רעקארדירונגען און עדות וואס האבן געזעהן דריי פארמאסקירטע פארשוינען גיסן ברענשטאף און אונטערצינדן די פאדערשטע טייל פון די אמבולאנסן.
פייערלעשער זענען אנגעקומען אויפן סצענע און פארלאשן די פלאמען, און א העפטיגע אויספארשונג איז געעפנט געווארן דורך מערערע רעגירונגס דעפארטמענטס, וואס האבן באשטעטיגט אז עס האנדלט זיך פון א טעראריסטישע אקציע, און א איסלאמישע טעראר גרופע וואס איז הויפטקוואטירט אין איראן וואס איז פאראנטווארטליך אויף עטליכע אנטיסעמיטישע אינצידענטן אין אייראפע די לעצטערע וואכן, האט אויך גענומען פאראנטווארטליכקייט אויף די דאזיגע אטאקע.
בריטישע פאליטיקאנטן און הויכראנגיגע רעגירונגס באאמטע האבן שארף פארדאמט די אטאקע, און די לאקאלע גאווערמענט האט דערקלערט אז זיי וועלן שיקן שטאטישע אמבולאנסן פאר די הצלה אגענטור צו קענען אפערירן מיט זייערע רעטונג אקטיוויטעטן אויף דערווייל, ביז די גאווערמענט וועט צושטעלן נייע אמבולאנסן פאר הצלה.
