א היסטארישע בריוו ערשיינט היינט לאור עולם, אונטערגעשריבן דורך אלע קינדער און איידימער פון כ"ק אדמו"ר הרה"ק בעל ברך משה מסאטמאר זצ"ל, וואו די אדמורי"ם ורבנים ווענדן זיך צו כלל חסידי סאטמאר ברחבי תבל איבער דעם וואס מען איז עוסק אצינד צו פארטיילן די ירושה פון זייער גרויסן טאטן דער סאטמארער רבי זצ"ל.
אויפן בריוו האבן אונטערגעשריבן די חשובע קינדער פונעם רבי'ן זצ"ל, ה"ה כ"ק אדמו"ר מסאטמאר שליט"א, הגה"צ אבד"ק זענטא שליט"א, כ"ק אדמו"ר מסאטמאר שליט"א, און הגה"צ אבד"ק סאטמאר 15 שליט"א, און די איידימער הגה"צ גאב"ד סאטמאר ב"פ שליט"א, הגה"צ גאב"ד סאטמאר מאנטריאל שליט"א, און הגה"צ גאב"ד סאטמאר מאנסי שליט"א.
די אדמורי"ם ורבנים שרייבן אז אין די יעצטיגע טעג איז מען עוסק צו פארטיילן די ירושה פונעם רבי'ן דער ברך משה זצ"ל צווישן אלע קינדער, און ווי מען ווייסט זענען פילע חפצי קודש און ירושה ספרים פארשוואונדן געווארן דורכאויס די יארן, דעריבער בעט מען פון יעדן איינעם צוריקצוברענגען אלס וואס געהערט פאר די יורשים, מיט א באשטימטע זמן אז ווער עס ברענגט עס צוריק ביז קומענדיגן ל"ג בעומר ווערט עס פאררעכנט במחילה גמורה מצדינו על העבר.
די אדמורי"ם ורבנים האבן געשטעלט דריי שלוחים וואס זאלן עוסק זיין דערין, און צו זיי קען מען זיך ווענדן צוריקצוברענגען די ספרים און חפצים און פאר סיי וועלכע שאלות, הרב החסיד ר' משה פריעדמאן הי"ו משב"ק כ"ק אדמו"ר מסאטמאר שליט"א, און הרב החסיד ר' שמואל הכהן פריעדמאן הי"ו און הרב החסיד ר' חיים שלמה פישער הי"ו משמשים בקודש ביי כ"ק אדמו"ר מסאטמאר שליט"א.
די דאזיגע אנטוויקלונג קומט נאך לענגערע עסקנות דורך די משמשים בקודש ונכבדי העדה, נעכטן זונטאג האט הנגיד החסיד ר' ליפא פריעדמאן הי"ו מנכבדי ק"ק סאטמאר אין בארא פארק, און זון פון הרב החסיד ר' משה פריעדמאן הי"ו משב"ק אדמור"י סאטמאר, באזוכט אין שטוב פון כ"ק אדמו"ר מסאטמאר שליט"א אין קרית יואל, וואו מען איז דורכגעגאנגען די פרטי הדברים, און דער סאטמארער רבי שליט"א האט אונטערגעשריבן דעם בריוו בכתב יד קדשו.
