תלמידי וחסידי סאטמאר קוקן זיך צו מיט פרייד צו די היסטארישע אנטוויקלונג וואס קומט פאר יעצט דאנערשטאג נאכמיטאג אין ניו יארק, ווען די חפצי ירושה פון כ"ק אדמו"ר הרה"ק בעל ברך משה מסאטמאר זצ"ל ווערט צוטיילט בעמק השוה צווישן די קינדער, ביי א פאראייניגטע זיצונג דורך די בני משפחת המלוכה און די משמשים בקודש בחצרות הקודש סאטמאר.
בעפאר יו"ט פסח איז באקאנט געווארן די נייעס אז די עסקנים רוקן זיך פאראויס מיט די חלוקת הירושה, ווען אלע קינדער פונעם סאטמארער רבי'ן זצ"ל דער ברך משה האבן אונטערגעשריבן א פאראייניגטע בריוו בעטנדיג פון אלע וואס האבן ביי זיך חפצי ירושה פון זייער גרויסן פאטער, אז מען זאל דאס צוריקגעבן פאר די יורשים כדת וכדין.
היינט דאנערשטאג קומט פאר די מעמד חלוקת הירושה, אין שטוב פון הנגיד החסיד ר' ליפא פריעדמאן הי"ו, וואו עס באטייליגן זיך פארשטייער פון ביידע סאטמארער הויפן.
מטעם בית כ"ק אדמו"ר מסאטמאר שליט"א באטייליגן זיך דער יונגסטער זון פונעם רבי'ן הגה"צ ר' יואל טייטלבוים שליט"א אב"ד בית ברוך אין קרית יואל, דער משמש בקודש הרה"ח ר' חיים שלמה פישער הי"ו, הנגיד החסיד ר' מאיר הירש הי"ו און נאך.
מטעם בית כ"ק אדמו"ר מסאטמאר שליט"א באטייליגן זיך דער צווייטער זון פונעם רבי'ן הגה"צ ר' יעקב בער טייטלבוים שליט"א אב"ד סיגעט, די משמשים בקודש הרה"ח ר' משה פריעדמאן הי"ו און הרה"ח ר' שמואל טייטלבוים הי"ו, הנגיד החסיד ר' אליעזר קעסטנבוים הי"ו און נאך.
מטעם הגה"צ אבד"ק זענטא שליט"א באטייליגט זיך זיין זון הרב חיים הערש טייטלבוים שליט"א, און מטעם הגה"צ אבד"ק סאטמאר 15 שליט"א באטייליגט זיך זיין איידעם הרב משה הורוויץ שליט"א. אזוי אויך באטייליגן זיך הגה"צ ר' שלום גליק שליט"א ריש מתיבתא תורה ויראה ד'סאטמאר, און הגה"צ ר' שמעון כ"ץ שליט"א דומ"ץ סאטמאר מאנסי, וועלכע זענען די עדים נאמנים אויף די גורל וחלוקת הירושה.
אין די ערשטע שלב פון די גורל וחלוקת הירושה, האט דער עלטסטער זון כ"ק אדמו"ר מסאטמאר שליט"א זוכה געווען בגורל אויף די היסטארישע ירושה תפילין פון הרה"ק בעל קדושת יו"ט מסיגעט זי"ע, דער צווייטער זון הגה"צ אבד"ק זענטא שליט"א האט זוכה געווען בגורל אויף די ירושה מנורה פון הרה"ק בעל קדושת יו"ט מסיגעט זי"ע, דער דריטער זון כ"ק אדמו"ר מסאטמאר שליט"א האט זוכה געווען בגורל אויף די היסטארישע בריוו פון הרה"ק בעל דברי חיים מצאנז זי"ע, וואו דער צאנזער רב שרייבט אז הרה"ק בעל קדושת יו"ט מסיגעט זי"ע וועט נאך געהאלפן ווערן מיט זרע של קיימא. דער פערטער זון הגה"צ אבד"ק סאטמאר 15 שליט"א האט זוכה געווען בגורל אויף די ירושה מגילה פון הרה"ק בעל קדושת יו"ט מסיגעט זי"ע.
די באריכט פון די אנדערע חפצי ירושה און ווער עס האט זוכה געווען דערויף וועט בעז"ה נאכפאלגן.
