א שווערע בשורה איז אנגעקומען היינט פון ארץ ישראל, אז עס איז נפטר געווארן הרבנית הצדיקת מזידטשויב ספינקא ע"ה, הרבנית בריינדל לאה כהנא ע"ה, אלמנת כ"ק אדמו"ר מזידטשויב ספינקא הרה"צ רבי צבי הירש כהנא זצ"ל, און א טאכטער פון כ"ק אדמו"ר מטשאקאווא זצ"ל בעל דברי נפתלי ויושב ראש וועד הכשרות פון די עדה החרדית, וועלכער איז נפטר געווארן מיט פיר יאר צוריק.
די רעבעצין ע"ה איז געווען איינס פון דריי טעכטער פון כ"ק אדמו"ר מטשאקאווא זצ"ל, וועלכער האט נישט איבערגעלאזט קיין זיהן נאר טעכטער, איינער פון די דריי איז שוין נפטר געווארן בחייו, הרבנית שלאמצא איידל דינה געשטעטנער ע"ה, אשת חבר כ"ק אדמו"ר מטשאקאווא שליט"א.
אויפן שויס פון אירע חשובע עלטערן איז זי אויפגעוואקסן און נתחנך געווארן, זייענדיג א צווייגעלע פון הערליכע רעבישע משפחות, ציענדיג א יחוס צו די הייליגע צדיקים לבית צאנז, גארליץ, זימיגראד, טשאקאווא, שאץ, פרימישלאן, זלאטשוב, און נאך פיל.
בהגיעה לפירקה האט זי חתונה געהאט מיט איר חשובער מאן הרה"צ רבי צבי הירש כהנא זצ"ל אדמו"ר מזידטשויב ספינקא, אן אייניקל פון כ"ק אדמו"ר הרה"ק רבי יוסף מאיר מספינקא ירושלים זצ"ל, אינאיינעם האבן זיי אויפגעשטעלט א שיינעם שטוב, און משפיע געווען פאר אידישע קינדער אין שטאט בית שמש אויפן וועג פון די גרויסע אבות.
ליידער האט זי געליטן שווערע יסורים דורכאויס די יארן, מיט עלף יאר צוריק איז איר גרויסער מאן דער זידטשויב ספינקא רבי זצ"ל נפטר געווארן לחיי העולם הבא, אין בליענדן עלטער פון דריי און פופציג יאר, און היינט איז די רעבעצין ע"ה נפטר געווארן אין בליענדן עלטער פון פיר און זעכציג יאר, א קארגע וואך בעפאר איר פינף און זעכציגסטע יום הולדת.
די לוויה איז פארגעקומען היינט נאכמיטאג ביים בית הלוויות שמגר אין ירושלים, און זי איז געקומען לקבורה אויפן הר הזיתים, איבערלאזנדיג א שיינעם דור בליעה"ר, אריינגערעכנט צוויי חשובע אדמורי"ם אין בית שמש, דער עלטסטער זון הרה"צ רבי יעקב שלמה כהנא שליט"א אדמו"ר מזידטשויב ספינקא, און דער צווייטער זון הרה"צ רבי יוסף מאיר כהנא שליט"א אדמו"ר מטשאקאווא בית שמש.
