דעם קומענדיגן שבת קודש פרשת אחרי קדושים וועט פארקומען א גרויסע שבת התאחדות פאר כלל חסידי לוצק אין אמעריקע, אין שפיץ פון כ"ק אדמו"ר מלוצק שליט"א וועלכער איז צוגאסט די טעג דאהי אין אמעריקע, די שבת וועט געפראוועט ווערן אין די רעטריעט האטעל ביי די קלארקס סאממיט קאמפלעקס אין פענסילוועניע, נישט ווייט פון די באקאנטע שטאט סקרענטאן.
דער רבי שליט"א איז אנגעקומען נעכטן זונטאג קיין טאראנטא אין קאנאדע, וואו ער האט האלט זיך אויף ביז מיטוואך בקרב חסידיו תושבי העיר, אין שטוב פון הנגיד החסיד ר' דוד דאנקונא הי"ו. זונטאג נאכט איז פארגעקומען א שיינע מעמד קבלת פנים לכבודו, אין שטוב פון הנגיד ר' שמואל לעמעל הי"ו.
קומענדיגן מיטוואך פארט דער רבי ארויס קיין דעטרויט, צו פוקד זיין דעם ציון הק' פונעם פעטער הרה"ק רבי יעקב חיים מסטאלין דעטרויט זי"ע לרגל די יומא דהילולא קדישא וואס געפאלט דעם דאנערשטאג ו' אייר, ומנוחתו כבוד אין שטאט דעטרויט.
פון דעטרויט וועט דער רבי פארזעצן די נסיעה קיין פענסילוועניע, אין בעפארברייטונג צום גרויסן שבת "דברי כאש" התאחדות חסידי לוצק בארה"ב, נאך שבת וועט דער רבי צוריקפארן קיין טאראנטא פאר נאך עטליכע טעג, און דערנאך זיך אומקערן אהיים למעון קדשו אין ארץ ישראל.
