חסידי ערלוי אין שטאט אלעד ציילן שוין די שעות צום געהויבענעם באזוך פון כ"ק אדמו"ר מערלוי שליט"א, וואס איז ערווארטעט אנצוקומען דעם סוף וואך אין שטאט אויף א לענגערע באזוך בקרב חסידיו תושבי העיר, מאציל זיין מזיו הודו והדרו און משפיע זיין תורה וחסידות אויף תלמידי וחסידי ערלוי אינעם בליענדן שטאט אלעד.
די געהויבענע באזוך איז שוין געווען באשטימט אויף פאריגן חודש אדר, אבער איז צוליב פארשידענע סיבות געווארן אפגעשטופט אויף א שפעטערדיגע געלעגנהייט, און אצינד גרייט מען זיך שוין צום גרויסן שבת און ימי ביקורי ענווים וואס וועט בעז"ה פארקומען די וואך פרשת אמור, ווען דער רבי שליט"א וועט מופיע זיין בשערי העיר, פראווענען א גרויסן שבת אין ביהמ"ד ערלוי אין שטאט, און פארוויילן פאר עטליכע טעג אינאיינעם מיט די חסידים צו משפיע זיין אויף זיי פונדערנאנט.
דער רבי שליט"א וועט אנקומען אין שטאט דאנערשטאג נאכמיטאג פרשת אמור, און וועט בעז"ה ווערן אפגעווארט דורך די ילדי חן ברחובה של עיר, פארנט פון ביהמ"ד ערלוי וואו דער רבי וועט האבן די אכסניא דורכאויס די ימי הביקור. דאנערשטאג נאכט נאך מעריב וועט בעז"ה פארקומען א גרויסע מעמד קבלת פנים ברוב עם אין ביהמ"ד, וואו דער גאנצער ציבור וועט אריבערגיין שלום נעמען בפני הקודש.
פרייטאג אינדערפרי וועט דער רבי באזוכן אין די תלמוד תורה דחסידי ערלוי אין שטאט, און משמיע זיין דברות קודש ודברי הדרכה פאר די קינדערלעך די תינוקות של בית רבן, שבת קודש וועט געפראוועט ווערן אלע תפילות און טישן אין ביהמ"ד ערלוי, וואו עס ווערט אויפגעשטעלט הויכשטאקיגע פארענטשעס צו קענען אקאמאדירן דעם גאנצן ציבור. נאך שבת וועט דער רבי פארבלייבן אין שטאט פאר עטליכע טעג, און אויפנעמען דעם ציבור חסידים לעצה ולברכה.
