נאך א זיצונג היינט נאכמיטאג במעון תורתו פון הגאון הגדול רבי דוב לאנדא שליט"א ראש ישיבת סלאבאדקע, אינאיינעם מיט די חרדישע חברי כנסת און פאליטיקאנטן אין ארץ ישראל, האט דער ראש ישיבה אפגעשריבן א מכתב קודש וואו ער שטעלט די קלארע דעת תורה, אז די עסקנים זאלן זאפארט פארלאזן די קאאליציע און אויפלעזן די רעגירונג, נאך וואס די מדינת ישראל רעגירונג קומט נישט נאך די פארלאנגען פון די יהדות החרדית.
דאס קומט נאך א רייע פרואוון אין די לעצטערע חדשים אויסצוארבעטן פארשידענע דעטאלן צו פארגרינגערן פאר לומדי תורה, וואס זענען ליידער נישט דערהערט געווארן אין די מדינת ישראל רעגירונג קארידארן, און דער ראש ישיבה האט דערקלערט אז דער מדינת ישראל פרעמיער מיניסטער נתניהו איז מער נישט באגלייבט. דער ראש ישיבה שרייבט אינעם בריוו אז די עסקנים פון דגל התורה האבן געטון מער ווי זייער מעגליכקייט צו שתדל'ן, און אז מען הערט זיי נישט אויס איז נישטא קיין שום חיוב צו זיצן אין א רעגירונג וואס איז נישט גרייט מיטצוארבעטן.
דער ראש ישיבה שטעלט קלאר אז פון היינט אן וועט מען בלויז קאנצענטרירן אויף דאס וואס איז גוט פאר די יהדות החרדית, און דעריבער דארף מען זעהן צוצואיילן פרישע וואלן אין די נאנטע צוקונפט, ווען אלע רעדערייען פון ביז יעצט איז גארנישט ווערד.
