תלמידי וחסידי סאטמאר אין מאנטריאל זענען איינגעהילט אין עקסטאז מיטצוהאלטן געהויבענע טעג בצל הקודש פון כ"ק אדמו"ר מסאטמאר שליט"א, ווען עס איז נארוואס באשטעטיגט געווארן אז דער רבי שליט"א וועט אפרייזן קיין מאנטריאל קאנאדע לרגל די הרחבת גבולי הקדושה, מיטן גמר המקח פון די נייע בנין התלמוד תורה "בנין ניישטאדט".
ווי באקאנט האט די סאטמארע מוסדות אין מאנטריאל אפגעקויפט א הערליכע בנין רחבת ידים מיט עטליכע חדשים צוריק, צו דינען אלס אכסניא של תורה פאר די בליענדע תלמוד תורה דחסידי סאטמאר אין שטאט, וואס איז אין די קורצע תקופה זינט איר גרינדונג שוין אויסגעשטיגן אלס א ריכטיגע חסידישע מוסד מיט פילע מעלות ומידות.
אצינד ווען מען גרייט זיך צום גמר המקח, אין די צייט וואס די קול התורה הערט זיך שוין בין כותלי הבנין ווען די ילדי הת"ת זענען שוין איינקוואטירט דארט אין די פרישע געביידע, וועט כ"ק אדמו"ר מסאטמאר שליט"א מופיע זיין בשערי העיר אפצונעמען נדבת לבם פון די חברי הקהילה חסידי סאטמאר תושבי העיר, און באשיינען א רייע מסיבות און מעמדים לטובת די גמר המקח.
די נסיעה איז באשטימט אויף קומענדיגן פרשת קרח ראש חודש תמוז, אנגעהויבן פון מאנטאג די ערשטע טאג ראש חודש ביז נאך דינסטאג די צווייטע טאג ראש חודש, ווען עס ווערט געפלאנט א רייע מעמדים אין שפיץ פונעם רבי'ן, וואס וועלן האבן די געלעגנהייט להסתופף בצל הקודש ביי זיי אין שטאט.
