מיט עקסטאז און פרייד האבן תלמידי וחסידי באבוב 45 אין לאנדאן ענגלאנד אויפגענומען די פרייליכע מעלדונג אז הנה מלכך בא, כ"ק אדמו"ר מבאבוב 45 שליט"א וועט אונטערנעמען א געהויבענע מסע הקודש קיין לאנדאן אין צוויי וואכן ארום, צו באשיינען די גרויסע מעמד הנחת אבן הפינה פאר די נייע בית המדרש דחסידי באבוב 45, וואס ווערט געבויעט לשם ולתפארת אין צענטער פון די חרדישע סטעמפארד הילל געגנט אין לאנדאן.
די בוי ארבעט ביים שטח הבניה ביים ווינקל פון קלעפטאן קאממאן און די ברעידאן גאס גייט שוין א שטיק צייט, ווען מען האט אראפגעגראבן פינף און דרייסיג פיס אונטער די ערד, אין די צייט וואס מען בויעט אויף א שנעלן טעמפא אהערצושטעלן דעם פראכטפולן בנין ביהמ"ד, וואס וועט ארייננעמען א גרויסן היכל ביהמ"ד, דאווענען שטיבלעך און א היכל התורה, א מקוה און א שמחה זאל.
זיך גרייטענדיג צום פרייליכן חגיגת הנחת אבן הפינה, איז אצינד געמאלדן געווארן אז דער רבי שליט"א וועט אנקומען צוגאסט קיין לאנדאן פאר א קורצע באזוך צו באשיינען דעם גרויסן מעמד, דער רבי שליט"א איז ערווארטעט אנצוקומען קיין לאנדאן מיטוואך אינדערפרי פרשת קרח הבעל"ט, און צומארגנס דאנערשטאג ביום ג' תמוז וועט פארקומען די מעמד הנחת אבן הפינה ברוב פאר והדר.
