דעם זונטאג פרשת שלח אין ארץ ישראל, האבן פילצאליגע אדמורי"ם ורבנים פון ארץ ישראל זיך פארזאמלט ביי א דריגענדע אסיפה לטובת די וועלט בארימטע "קרן עולם התורה", די אסיפה איז פארגעקומען אין זאל פון כתר הרימון אין בני ברק, אין שפיץ פון די גדולי הדור, אדמורי"ם רבנים וראשי ישיבות.
צווישן אנדערע האבן זיך באטייליגט כ"ק האדמורי"ם מצאנז, טשערנאביל, סערט וויזניץ, וויזניץ, נדבורנא, ביאלא, קרעטשניף, אלכסנדר, דאראג, שבט הלוי, הגה"צ ר' אהרן מרדכי רוקח בן כ"ק אדמו"ר מבעלזא, הגה"צ המשפיע ר' אלימלך בידערמאן, ראש ישיבת טשעבין, ראש ישיבת וויזניץ, ראש ישיבת סלונים. די זקני ראשי הישיבות הגאון הגדול רבי דוב לאנדא ר"י סלאבאדקע, הגאון הגדול רבי משה הלל הירש ר"י סלאבאדקע, הגאון הגדול רבי מאיר צבי בערגמאן, הגאון הגדול רבי יצחק זילבערשטיין גאב"ד רמת אלחנן, הגאון הגדול רבי שאול אלתר, הגאון הגדול רבי דוד כהן ר"י חברון, הגאון הגדול רבי שמעון גלאי, הגאון הגדול רבי אברהם סאלים, הגאון הגדול המשגיח רבי דן סגל, און נאך פילע גדולי הדור.
דורכאויס די אסיפה האבן אויפגעטרעטן די גדולי הדור, כ"ק אדמו"ר מצאנז שליט"א, די זקני ראשי הישיבות הגאון הגדול רבי דוב לאנדא שליט"א ראש ישיבת סלאבאדקע, הגאון הגדול רבי משה הלל הירש שליט"א ראש ישיבת סלאבאדקע, און הגאון הגדול רבי מאיר צבי בערגמאן שליט"א, הגאון הגדול רבי אברהם סאלים שליט"א ראש ישיבת מאור התורה, און הגאון הגדול רבי דוד כהן שליט"א ראש ישיבת חברון. אלע צוגלייך האבן ארויסגעברענגט די געוואלדיגע חוב וואס ליגט אויף יעדן איד ארויסצוהעלפן די קרן עולם התורה, צו פארזיכערן אז די ישיבות און כוללים קענען ווייטער אנגיין אומגעשטערט, טראץ די ביטערע רדיפות פון די מדינת ישראל אינסטאנצן.
אזוי אויך האט הגה"צ ר' מנחם ארנסטר שליט"א ראש ישיבת וויזניץ פארגעליינט א מכתב קודש פונעם שוואגער כ"ק אדמו"ר מוויזניץ שליט"א לרפו"ש וועלכער האט זיך נישט פערזענליך באטייליגט מפאת חולשתו.
