הונדערטער חסידי ברסלב אין עיר התורה והחסידות מאנסי גרייטן זיך מיטצולעבן א געהויבענע שבת, בצילו פונעם חשובן משפיע ומלהיב לבבות ישראל לאביהם שבשמים, הגה"צ ר' ישראל מאיר גאלינסקי שליט"א מגדולי משפיעי ברסלב בארה"ק, וועלכער איז אנגעקומען צוגאסט קיין ניו יארק אריינצובלאזן עמערס חיזוק און טללי תחיה ביים אמעריקאנעם אידנטום.
דער חשובער משפיע וועט אצינד צום ערשטן מאל באזוכן אין די בליענדע קהילה "התאחדות חסידי ברסלב" אין מאנסי, סטאנציאנירט אין בנין פון ביהמ"ד אהל משה קאזלאוו אויף פעיקין אין ספרינג וואלי, וואו עס איז פארהאן א לעכטיגע קבוצה חסידים ואנשי מעשה וואס דערווארעמען זיך אינאיינעם בתורה וחסידות מדי שבוע בשבוע.
פרייטאג צונאכטס נאכן דאווענען וועט דער משפיע פארלערנען א שיעור בספרי חסידות, און שבת אינדערפרי נאכן דאווענען וועט פארקומען א גרויסע קידוש, וואו דער משפיע וועט פארלערנען אין ספר סיפורי מעשיות. שפעטער בעידן רעוא דרעוין וועט ער אפרעכטן א געהויבענע שלש סעודות און פארלערנען בספה"ק ליקוטי מוהר"ן במעמד קהל רב.

