תלמידי וחסידי סאטמאר אין ארץ ישראל גרייטן זיך מיטצולעבן א גרויסארטיגער שבת אין די היסטארישע געסעלעך בעיר הקודש צפת, ווען עס וועלן זיך פאראייניגן די הונדערטער חסידים פון ארץ ישראל, לומדי מסגרת הלימוד "זכרו" דחסידי סאטמאר, אין שפיץ פון הגה"צ ר' חיים הערש טייטלבוים שליט"א אבד"ק סאטמאר ירושלים, בנו הגדול פון כ"ק אדמו"ר מסאטמאר שליט"א.
די געהויבענע שבת ווערט געפראוועט לרגל די גרויסע דערגרייכונג ווען די חברי הקהילה זענען מסיים חצי ש"ס, געלערנט אינערהאלב די סדר לימוד פון זכרו, נאך לענגערע יארן פון הארעוועניע און התמדה בתורה, טעגליכע שיעורים צו ענדיגן דעם סדר הלימוד, און מען גרייט זיך שוין צום פרייליכן מאמענט פון סיום חצי הש"ס ברוב פאר והדר.
די שבת וועט געפראוועט ווערן דעם שבת קודש פרשת שלח, שבת פרשת קרח אין ארץ ישראל, ווען דער רב שליט"א וועט קומען צו פארן קיין ארץ ישראל לעשות את השבת, בשליחות הקודש פון אביו הגדול כ"ק אדמו"ר מסאטמאר שליט"א, וועלכער האט פערזענליך אפגעשריבן א מכתב קודש לכבוד די חשובע מסיימים, אפעלירנדיג צו די וואס זענען נאכנישט אנגעשלאסן אין די חבורה אויסצונוצן די געלעגנהייט און אנהייבן דעם צווייטן האלב ש"ס לכבוד התורה ולומדיה.
