די אידישע געמיינדע אין מאנטשעסטער ענגלאנד האט אפגעאטעמט דעם פרייטאג, ווען עס איז באקאנט געווארן אז די צוויי ספרי תורה וואס זענען גערויבט געווארן פון א לאקאלע שוהל מיט עטליכע חדשים צוריק, איז ב"ה געפונען געווארן אין א גוטע צושטאנד.
מיט עטליכע חדשים צוריק האט זיך אפגעשפילט א ערנסטע רויבעריי ביי די עץ חיים שוהל אין מאנטשעסטער, ווען פארברעכער האבן געגנב'ט צוויי ספרי תורה און נאך ווערדפולע זאכן פון די שוהל, די זיכערהייט אינסטאנצן האבן אונטערגענומען א מאסיווע אויספארשונג, אבער האבן נישט אזוי שנעל באוויזן צו כאפן די פארברעכער און לייגן א האנט אויף די ספרי תורה.
אצינד האט מען געפונען די ספרי תורה אויף א טעראסע פון א קירכע, ווען איינער פון די קירכע מיטגלידער וואס האט עס באמערקט האט זיך פארבינדן מיט א לאקאלע אידישע עסקן. די ספרי תורה זענען ב"ה נישט געשעדיגט און וועלן אין די נאנטע טעג צוריקגעברענגט ווערן צום עץ חיים שוהל.
