קומענדיגע וואך זונטאג וועט כ"ק אדמו"ר מצאנז זוועהיל שליט"א ארויספארן אויף א געהויבענע מסע הקודש קיין ארץ ישראל, לפאר על ראש שמחתו ביי די שמחת החתונה פון א אייניקל, און לרגל די יומא דהילולא קדישא פון זיין גרויסן שווער כ"ק אדמו"ר הרה"ק מצאנז קלויזענבורג זצ"ל בעל שפע חיים.
דער רבי שליט"א איז ערווארטעט צו פארלאזן ביתו נאוה קודש אין יוניאן סיטי קומענדיגן זונטאג פרשת חוקת בלק על אם הדרך קיין ארץ ישראל, אנקומענדיג קיין ארץ ישראל מאנטאג פרשת בלק בא"י וועט דער רבי באלד צופארן קיין קרית צאנז נתני', לרגל די יומא דהילולא קדישא פון זיין גרויסן שווער וואס געפאלט דינסטאג נאכט ט' תמוז, דער רבי שליט"א וועט פוקד זיין דעם ציון הק' בעצם יומא דהילולא אויפן בית החיים ותיקים אין קרית צאנז נתני', און מיטהאלטן דעם יארצייט טיש בצל הקודש פונעם שוואגער כ"ק אדמו"ר מצאנז שליט"א.
אזוי אויך וועט דער רבי שליט"א באשיינען די שמחת השבע ברכות ונעילת ימי השמחה פון א אייניקל ביים שוואגער כ"ק אדמו"ר מצאנז שליט"א, די כלה א טאכטער פון זיין זון הגה"צ ר' יוסף משה דוב האלבערשטאם שליט"א אבד"ק צאנז ארה"ב וראש ישיבת צאנז.
דאנערשטאג פרשת חוקת בלק וועט דער רבי ארויספארן קיין גליל, מתפלל זיין ביי די מקומות הקדושים אין מירון צפת און טבריה, אינאיינעם מיט פילע חסידים סיי פון ארץ ישראל און סיי פון חוץ לארץ וואס גרייטן זיך מיטצוהאלטן די געהויבענע מסע הקודש.
שבת קודש פרשת חוקת בלק וועט דער רבי שליט"א זיין צוגאסט אין קרית צאנז נתני', בצל הקודש פונעם שוואגער כ"ק אדמו"ר מצאנז שליט"א, דערביי וועט געפראוועט ווערן די שמחת האויפרוף פון א אייניקל ביים רבי'ן שליט"א, די חתן א זון פון זיין איידעם הגה"צ ר' יעקב בערגער שליט"א, מיט די כלה א אייניקל פון כ"ק האדמורי"ם מנדבורנא חיפה און אנטוניא שליט"א.
זונטאג פרשת פנחס וועט דער רבי שליט"א מתפלל זיין ביי די מקומות הקדושים אין ירושלים עיה"ק, און דערנאך זיך אומקערן קיין קרית צאנז נתני', וואו עס וועט געפראוועט ווערן די שמחת החתונה פונעם רבינ'ס אייניקל, מאנטאג אויפדערנאכט אינעם גרויסן זאל היכל ראזענבערג אין קרית צאנז.
דינסטאג פרשת פנחס וועט געפראוועט ווערן די שמחת השבע ברכות דורכ'ן רבי'ן, און דערנאך וועט דער רבי פארבלייבן אין ארץ ישראל נאך עטליכע טעג צו באשיינען די אנדערע שבע ברכות'ן בשמחתו הגדולה.
