קומענדיגע וואך פרשת בלק וועט כ"ק אדמו"ר מטשערנאביל שליט"א ארויספארן אויף א קורצע מסע הקודש פון ארץ ישראל קיין מאלדאווע, לרגל די יומא דהילולא קדישא פון זקינו הרה"ק רבי יחיאל מקרילאוויץ זי"ע וואס געפאלט אויס ט' תמוז, נאך וואס בשליחות הקודש פונעם רבי'ן האט מען אין די יעצטיגע טעג הערליך איבערגעבויעט און מחדש געווען דעם ציון הק' וואס געפונט זיך אין שטאט קעשינאוו אין מאלדאווע.
הרה"ק רבי יחיאל מקרילאוויץ זי"ע איז געווען פון די גרויסע חסידישע רבי'ס אין ראמעניע און מאלדאווע, ער איז געווען א זון פון הרה"ק רבי משולם זוסיא מזינקוב זי"ע, אן אייניקל פון הרה"ק בעל אוהב ישראל מאפטא זי"ע, פון הרה"ק רבי משה צבי מסאווראן זי"ע, און אן איידעם ביי הרה"ק רבי יהושע דער מיטעלער בעלזא רב זי"ע.
כ"ק אדמו"ר מטשערנאביל שליט"א ציהט זיין הערליכע יחוס צו הרה"ק רבי יחיאל מקרילאוויץ זי"ע, זייענדיג א זון פון כ"ק אדמו"ר מטשערנאביל זצ"ל, א זון פון הרה"ק רבי חיים יצחק מלויעוו זצ"ל, אן איידעם ביי הרה"ק רבי ישעי'לע פון טשעחויב זי"ע, וועלכער איז געווען אן איידעם ביי הרה"ק רבי יחיאל מקרילאוויץ זי"ע.
אין די פארגאנגענע יארן האט דער טשערנאבילער רבי שליט"א אסאך עוסק געווען איבערצובויען דעם ציון הק' אין שטאט קעשינאוו אין מאלדאווע, און אצינד ווען די עבודת הקודש איז פארענדיגט געווארן, איז געמאלדן געווארן אז דער רבי שליט"א וועט ארויספארן אויף א קורצע מסע הקודש צום יומא דהילולא קדישא און מתפלל זיין ביים ציון הק' להיפקד בדבר ישועה ורחמים.
לויטן פלאן וועט דער רבי אנקומען אין קעשינאוו קומענדיגע וואך מיטוואך ט' תמוז אין די מיטאג שעה'ן, און ארום דריי אזייגער פוקד זיין דעם ציון הק' אינאיינעם מיט פילע חסידים וואס וועלן קומען צו פארן אינאיינעם מיטן רבי'ן, דערנאך וועט פארקומען א מסיבת לחיים לרגל יומא דהילולא קדישא ולרגל המאורע מיטן באנייען דעם ציון הק', אין די ארטיגע בית הכנסת אגודת ישראל.
