חסידי צאנז קלויזענבורג האבן מיטגעלעבט א פרייליכע שבת די וואך פרשת פנחס, ווען עס איז געפייערט געווארן הרחבת גבולי הקדושה מיטן עפענונג פון א נייע בית המדרש אין שטאט מאנסי, א נייע ביהמ"ד וואו די חסידים וועלן זיך צוזאמקומען און פארברענגען אינאיינעם בתורה ותפילה ודיבוק חברים.
די נייע בית המדרש אין די ספרינג וואלי געגנט, אויף 29 וועסט סטריט, צווישן מעיפל עוועניו און וועסט סענטראל, איז שוין די דריטע בית המדרש דחסידי צאנז קלויזענבורג אין שטאט, אין צוגאב צו די צענטראלע ביהמ"ד אויף מעין סטריט, און די ביהמ"ד וואס איז לעצטנס פראכטפול באנייעט געווארן אויף בעיטס.
לרגל די הרחבת גבולי הקדושה מיטן עפענען די נייע ביהמ"ד, האט כ"ק אדמו"ר מצאנז קלויזענבורג שליט"א איבערגעגעבן עטליכע הוראות און הדרכות וויאזוי זיך צו פירן, סיי זיך צו נוהג זיין באהבה ואחוה ושלום ורעות, נישט צו רעדן ביים דאווענען און ביי קריאת התורה, און אז מען זאל שטעלן גבאים דערויף, און אז מען זאל זיך צוזאמקומען ביי שלש סעודות לחזק ולהתחזק בעבודת ה', לערנען די דברי תורה פונעם רבי'ן זצ"ל יעדע וואך דורך אן אנדערן מתפלל, אזוי אז יעדער זאל האבן די געלעגנהייט פארצולערנען די תורה, ללמוד וללמד לשמור ולעשות.
