אלפי חסידי וויזניץ פון איבער גאנץ ארץ ישראל גרייטן זיך צו א גרויסארטיגע עצרת תפילה והתעוררות צו מעתיר זיין לרפואתו השלימה פונעם רועה נאמן כ"ק אדמו"ר מוויזניץ שליט"א לרפו"ש, וואס וועט בעז"ה פארקומען דעם קומענדיגן דאנערשטאג נאכט פרשת מטות מסעי, אין די מסוגל'דיגע טעג פון די ימי בין המצרים.
אין א הארציגע בריוו אונטערגעשריבן דורך די דריי זיהן פונעם רבי'ן שליט"א, בנו הגדול הגה"צ ר' חיים מאיר האגער שליט"א אב"ד קרית וויזניץ, בנו הגה"צ ר' יצחק ישעי' האגער שליט"א, און בנו הגה"צ ר' יעקב מרדכי האגער שליט"א אב"ד וויזניץ אלעד, טוען די רבנים רופן דעם ציבור חסידים זיך צו פארזאמלען אינאיינעם און מעורר זיין רחמי שמים לרפואתו השלימה פונעם רבי'ן, להעתיר בעד אילנא דחייא המרווה צמאוננו כמים.
די רבנים שרייבן אינעם בריוו אז מען שטייט שוין נאנט צו די ימי הרחמים ומועדים, אויף וואס גאנץ כלל ישראל קוקט ארויס צו די תפילות ותחנונים, יעדער וואונטשט זיך א גוט יאר א שנת גאולה וישועה ובשורה טובה, און יעדער האפט אז דער רבי זאל שוין צוריקקומען לבריאותו האיתנה כבראשונה, ולשנה טובה ייכתב וייחתם לאלתר לחיים, און בפרט קוקן אלע חסידים ארויס אויף די ימים טובים מיטן האפענונג אז דער רבי זאל קענען פראווענען די עבודת הקודש אינאיינעם מיט די חסידים מתוך בריאות השלימה.
דעריבער האט מען באשטימט דעם גרויסן תפילת רבים וואס וועט פארקומען ביים שריד בית מקדשינו דער כותל המערבי, בהורמנא דמלכא פונעם רבי'ן שליט"א, וואו עס וועלן זיך פארזאמלען אלע וויזניצע חסידים זקנים עם נערים, אינגעלייט און בעלי בתים און די תלמידי הישיבות, אין אט דעם געהויבענעם זמן פון בין המצרים, ימים המסוגלים לתפילה, במקום שלא זזה ממנו שכינה, והן קל כביר לא ימאס תפילת רבים.
