ווי אין די פארגאנגענע פאר יאר איז אויך דאס יאר פארגעקומען די גרויסע מעמד "אגרא דתעניתא" בחצר הקודש סקולען אין לעיקוואד, ווען נאנט צו טויזענט בחורי הישיבות האבן זיך פארזאמלט ביום צום שבעה עשר בתמוז אין די נאכמיטאג שעות, און געלערנט פינף שעות רצופות, איינגעפירט דורך כ"ק אדמו"ר מסקולען שליט"א פון לעיקוואד.
די היי יעריגע סדר הלימוד איז פארגעקומען אינעם גרויסן ביהמ"ד דקהל אברכים, אין די דריי היכלי בית המדרש אין אלע דריי שטאקן פונעם בנין, וואו עס זענען געווען פארזאמלט הונדערטער לומדים בחורי הישיבות פון אלע קרייזן, און געהארעוועט אין לערנען מיט גרויס התמדה.
אינמיטן די סדר הלימוד איז דער סקולענער רבי שליט"א פון לעיקוואד ערשינען צווישן די לומדים און זיך ארומגעדרייט מיט גרויס קורת רוח, זיך מפלפל געווען מיט די בחורים און זיך געזעצט לערנען אלס פערזענליכע ביישפיל פאר די אנוועזנדע. נאכן סדר הלימוד האבן צענדליגע באסעס געפירט דעם ציבור צו א גרויסע זאל נעבן ביהמ"ד סקולען, וואו מען האט געהערט א דרשה פון הרה"ג ר' נחום בינדער שליט"א ראש ישיבת אלכסנדר. דאן האט מען געדאווענט מעריב אינאיינעם מיטן רבי'ן און אויסגעפאסט פון דעם לאנגן תענית.
נאכן אויספאסטן האט דער רבי שליט"א אפגעראכטן א לחיים טיש און אויפגעטרעטן מיט פאסיגע דברות קודש. מען האט זיך אויפגעשטעלט טאנצן און דער רבי האט פארטיילט פאר יעדן איינעם די ספר הק' בת עין אריינגעשריבן בחתימת יד קדשו.
