אלפי חסידי בעלזא האלטן מיט די אנטוויקלונג פון א נייע בעלזא ווינקל וואס פארמירט זיך אין די טעג, ווען עס ווערט געגרינדעט א נייע ישוב פאר חסידי בעלזא אין די מערבא געגנט אין קרית גת, א שיינע געגנט וואו עס ווערט אויפגעבויעט א גיגאנטישע דעוועלאפמענט פון טויזענטער דירות.
אין קרית גת איז שוין פארהאן א שיינע בעלזא קהילה, סטאנציאנירט אין די צענטראלע אידישע געגנט אין שטאט, און אצינד ווען עס איז ערמעגליכט געווארן צו דעזיגנירן הונדערטער דירות אין די נייע מערבא געגנט, איז באשטימט געווארן אז דארט וועט געעפנט ווערן א פרישע ישוב און א שיינע קהילה פאר חסידי בעלזא, זיך צו קענען איינהאנדלען א אייגענע דירה פאר א ביליגע פרייז.
אין די יעצטיגע טעג האבן די עסקני הקהילה פארגעלייגט די פלענער פארן מנהיג העדה כ"ק אדמו"ר מבעלזא שליט"א, וועלכער האט אויסגעפרעגט די פרטים און געוואונטשן ברכת קדשו, אז די אלע עסקנים און די אינגעלייט וואס וועלן זיך באזעצן דארט זאלן מצליח זיין אין אלע הינזיכטן.
