אין די יעצטיגע טעג האט די וויזניצע מוסדות אין חיפה אפגעקויפט א געביידע אין שטאט חיפה, וואס וועט בעז"ה פארוואנדלט ווערן אלס אכסניא של תורה פאר די וויזניצע חדר אין שטאט, תחת דגלו והדרכתו פון כ"ק אדמו"ר מוויזניץ שליט"א לרפו"ש, וועלכער האלט מיט די הרחבת גבולי הקדושה מיט גרויס פרייד.
די וויזניצע קהילה אין חיפה איז שטארק געשטיגן אין די לעצטערע יארן, אויסער די צענטראלע ביהמ"ד איז שוין געעפנט געווארן א צווייטע שטיבל, און די מוסדות הקדושים וואקסט אויך לשם ולתפארת. די נויט אהערצושטעלן א אייגענע אכסניא פאר די חדר האט זיך שטארק אנגעזעהן, און מיט גרויס הצלחה און סייעתא דשמיא האט מען זוכה געווען לברך על המוגמר און אפקויפן א בנין רחבת ידים וואס וועט פארוואנדלט ווערן אלס תלמוד תורה.
די רעדע איז פון א אפארטמענט געביידע אויף רחוב בר כוכבא אין חיפה, אין הארץ פון די חרדישע געגנט, און חסידי וויזניץ צייכענען צו מיט נאסטאלגיע, אז ממש נעבן דעם בנין איז אמאל געווען א וויזניצער בית המדרש, א היסטארישע חסידישע שטיבל וואו די פריערדיגע וויזניצער רביים, הרה"ק בעל אמרי חיים זצ"ל, און הרה"ק בעל ישועות משה זצ"ל, האבן געדאווענט און עוסק געווען בעבודת הקודש מיט צענדליגע יארן צוריק, הרה"ק בעל אמרי חיים זצ"ל ווען ער האט געפראוועט א שבת אין חיפה מיט גענוי זיבן און אכציג יאר צוריק, שבת פרשת מטות מסעי תרצ"ט, און הרה"ק בעל ישועות משה זצ"ל ווען ער האט געפראוועט דעם יו"ט ראש השנה אין שטאט חיפה אנקומענדיג קיין ארץ ישראל פאר די ימים הנוראים תש"ה.
