מיט גרויס פרייד אנטוויקלט זיך א פרישע שריט פון הרחבת גבולי הקדושה אינעם בליענדן ישוב אין יוניאן ניו דזשערזי, ווען אין די יעצטיגע וואכן האט מוסדות באבוב – 45 אין יוניאן געשלאסן מקח אויף א גאר גרויסן בנין אין יוניאן לטובת המוסדות הק'.
דער נייער בנין פון צוויי שטאק נעמט אריין אזויפיל ווי צוואנציג טויזענט סקווער פיס, און פארמאגט אויך גאר גרויסע ליידיגע שטחים רינגס און ארום פונעם בנין, דאס אלעס וועט אצינד רענאווירט און איבערגעפרישט ווערן, צו קענען דינען אלס אכסניא של תורה לצרכי המוסדות הק'. אין צוגאב איז פארהאן א גרויסע מעלה מיט דעם נייעם בנין אז עס געפונט זיך אין הארץ פון די היימישע געגנט, און געפינט זיך צופיסענס פון פילע משפחות תושבי העיר.
אין די נאנטע טעג וועט זיך אנהייבן די בוי ארבעט, ווען אינעווייניג אינעם בנין וועט אויפגעבויעט ווערן צענדליגע קלאס צימערן, א צאל אפיסעס, א גרויסע חדר אוכל און אלע אנדערע באדערפענישן וואס וועט בעז"ה ווערן אהערגעשטעלט ווערן בהרחבה גדולה.
די הנהלת המוסדות האפט אז דער נייער בנין וועט זיין גרייט קומענדיגן ווינטער, און וועט דאן אנהייבן דינען אלס קביעות'דיגע אכסניא פאר די בית חינוך לבנות. די ביז יעצטיגער בנין בית חינוך לבנות וועט אנהייבן דינען אלס דער בנין התלמוד תורה, אזוי ארום וועלן אלע אפטיילונגען פון די מוסדות געניסן פון גרויס הרחבה בס"ד.
