היינט פארמיטאג איז הרבנית הצדיקת מסקווירא תליט"א, אריינגעפירט געווארן אין שפיטאל אין א שווערע געזונט צושטאנד, אין די צייט וואס כלל ישראל איז מרבה בתפילה ותחנונים לרפואתה השלימה.
די רעבעצין תליט"א, אשת חבר כ"ק אדמו"ר מסקווירא שליט"א, און עלטסטע קינד פון כ"ק אדמו"ר הרה"ק בעל ישועות משה מוויזניץ זי"ע, געפונט זיך ליידער אין א שוואכע געזונט צושטאנד א לענגערע צייט, אין די לעצטע פאר טעג האט זיך די מצב פארערגערט נאך א שווערע אינפעקציע וואס מען האט נישט מצליח געווען צו באהאנדלען, און דעם אנהייב נאכט איז די מצב געווען גאר קריטיש.
היינט פארמיטאג איז די רעבעצין אריינגעפירט געווארן צו די מאונט סיני שפיטאל אין מאנהעטן, מיטן האפענונג צו קענען סטאבליזירן די מצב און היילן די אינפעקציע, מטעם די ביד"ץ אין סקווירא שטעטל איז ארויסגעשטעלט געווארן א מודעה צו כלל חסידי סקווירא, מען זאל מתפלל זיין לרפואתה השלימה פון
רעבעצין, און אין אלע מנינים שחרית האט מען געזאגט פרקי תהלים לרפואתה, הרבנית חי' חנה בת לאה אסתר לרפואה שלימה.
