חסידי ראחמיסטריווקא תושבי וויליאמסבורג זענען איינגעהילט אין טיפע התרגשות, זיך גרייטענדיג צום קומענדיגן שבת קודש פרשת משפטים ווען כ"ק אדמו"ר מראחמיסטריווקא וויליאמסבורג שליט"א וועט צום ערשטן מאל פראווענען א געהויבענע שבת בקרב חסידיו אין שטאט וויליאמסבורג, שטייענדיג שוין א האלבע יאר זינט די הסתלקות לשמי מרום פון כ"ק אדמו"ר הרה"ק מראחמיסטריווקא זי"ע.
ווי באקאנט איז דער רבי שליט"א אויפגענומען געווארן אלס ממשיך שלשלת הקודש אין וויליאמסבורג פארלאפענעם חודש כסלו, דער רבי האט שוין געפראוועט דעם יום טוב שמחת תורה אין וויליאמסבורג, און אפגעראכטן עטליכע וואכענדיגע טישן אין שטאט וויליאמסבורג, אצינד גרייט מען זיך צום ערשטן שבת וואס דער רבי וועט פראווענען בעיר ואם בישראל וויליאמסבורג, אין די צייט וואס דער רבי גרייט זיך אריבערצוציען וואוינען קיין וויליאמסבורג אנצופירן די קהילה קדושה פונדערנאנט.
לקראת דעם גרויסן שבת איז ארויסגעדינגען געווארן די פראכטפולע עידן פאלאס זאלן, וואס וועט ווערן אויסגעשטעלט אויף א ספעציעלע פארנעם פאר די תפילות און טישן דורכאויס שבת במעמד קהל רב. פארלאפענעם שבת קודש פרשת יתרו שבת קבלת התורה, האט דער רבי געפראוועט די תפילות און טישן אויף א ערשטמאליגן פארנעם אין גרויסן ראחמיסטריווקא בית המדרש אין בארא פארק, אין די צייט וואס דעם רבינ'ס עלטערע ברודער כ"ק אדמו"ר מראחמיסטריווקא שליט"א איז געווען צוגאסט אויף שבת אין שיכון סקווירא לרגל די שבת שבע ברכות פון א אייניקל.
