דעם שבת וועלן חסידי סקולען מיטהאלטן א געהויבענע שבת של שמחה בצל הקודש אין בארא פארק, אין שפיץ פון די צוויי ברידער כ"ק אדמו"ר מסקולען שליט"א, און אחיו הצעיר כ"ק אדמו"ר מסקולען ירושלים שליט"א, וועלכער האט מיט עטליכע יאר צוריק געדינט אלס רב אין דעם בית המדרש.
כ"ק אדמו"ר מסקולען ירושלים שליט"א איז געקומען צו פליען קיין אמעריקע מיטצוהאלטן די שמחת החתונה במעון הקודש פון אחיו הגדול דער סקולענער רבי שליט"א, לראות את שלום אחיו און מבקר חולה זיין, נאך וואס דער סקולענער רבי איז ב"ה אהיימגעקומען פונעם ווייטן אריזאנע נאך לענגערע חדשים.
דעם קומענדיגן שבת וועט געפראוועט ווערן די שבת שבע ברכות בחצר הקודש סקולען אין בארא פארק, אבער צוליב די שוואכע געזונט צושטאנד פונעם געהויבענעם בעל שמחה כ"ק אדמו"ר מסקולען שליט"א, האט דער רבי פארבעטן דעם יונגערן ברודער דער חשובער גאסט פון ארץ ישראל צו פארבלייבן אויף שבת, און אינאיינעם אפרעכטן די תפילות און טישן, וואס וועט אים פיל פארגרינגערן דורכאויס דעם גאנצן שבת.
