דעם זונטאג ביים ראש חודש טיש אין ביהמ"ד קאסוב אין בארא פארק, האט כ"ק אדמו"ר מקאסוב שליט"א ארומגערעדט איבער די השתדלות פון אידישע קינדער צו ברענגען משיח, און זיך אויסגעדרוקט אז אויב וועט כלל ישראל זיך צוזאמנעמען פאר דריי טעג און עוסק זיין בתורה ועבודה, וועט דער הייליגער באשעפער שיקן משיח אונז אויסלייזן שנעל און גיך.
דער רבי האט גערעדט איבער די מעשה פון אסתר המלכה, ווען די אידן האבן זיך צוזאמגענומען, געפאסט דריי טעג און עוסק געווען בעבודת הקודש אין שוהל פאר דריי טעג נאכאנאנד, און תיכף דערנאך איז געקומען די וואונדערליכע ישועה. דאס זעלבע האט דער רבי געזאגט, אז אויב כלל ישראל וועט זיך צאמנעמען פאר דריי טעג, אויפגעבן די ארבעט און זיצן אין שוהל לערנען און דאווענען א גאנצן טאג, וועט משיח שוין קומען מיט גרויס פרייד.
אין אנדערע נייעס, איז דער קאסובער רבי שליט"א נעכטן אפגעפלויגן קיין דייטשלאנד, וואו דער רבי גייט היינט אריבער א מעדיצינישע פראצעדור, ווי באשטימט מיט צוויי חדשים צוריק, היינט דינסטאג קומט פאר א עצרת תפילה והתעוררות אין ביהמ"ד קאסוב אין בארא פארק, צו מתפלל זיין לרפואתו השלימה פונעם רבי'ן, כ"ק מרן הרה"צ רבי שרגא פייוויש בן מלכה בתוך שאר חולי ישראל.
