בשמחה וחדוה זענען חסידי סאדיגורא נתבשר געווארן איבער די פרייליכע שמחה בחצר הקודש, שמחת לידת הבן ביי כ"ק אדמו"ר מסאדיגורא שליט"א, בעצם יום הפורים נעכטן זונטאג אינדערפרי.
די דאזיגע שמחה איז שוין די צווייטע אין הויף, נאכפאלגענדיג די געבורט פונעם ערשטן אינגעלע ביים רבי'ן קרוב צו צוויי יאר צוריק, וואס טראגט דעם נאמען "ישראל משה" נאכן רבינ'ס פאטער הרה"ק בעל עטרת ישראל מסאדיגורא זי"ע.
דורכאויס די מיטאג שעות בעצם יום הפורים זענען הונדערטער חסידים אריבער ביים רבי'ן וואונטשן מזל טוב און איבערגעבן משלוח מנות, און נעכטן אויפדערנאכט בהמשך צו די פורים טיש משתה היין אינעם גרויסן סאלאש, האט מען זיך געהויבן אין לענגערע ריקודין בתופים ובמחולות לכבוד די שמחה בבית צדיקים.
