אין די יעצטיגע טעג גרייט זיך כ"ק אדמו"ר מוויזניץ שליט"א פון קייאמישע, אפצופליען קיין פוילין אויף א מסע הקודש "בעבור אבותינו שבטחו בך", צו פוקד זיין די מקומות הקדושים אשר בארץ המה, אינאיינעם מיט א געקליבענע צאל חסידים תומכי המוסדות.
דער רבי פארט ארויס דעם מיטוואך נאכמיטאג אויפן וועג קיין ריישא, אנקומענדיג קיין פוילין דאנערשטאג נאכמיטאג וועט מען באלד צופארן צום שטאט דינוב, און פוקד זיין דעם ציון הק' פונעם הייליגן בני יששכר זי"ע, צו וועם דער רבי איז שטארק מקושר בדברי תורתו. פון דארט וועט מען פארן קיין רימנוב, וואו דער רבי וועט פראווענען א געהויבענע שבת אינעם בנין הכנסת אורחים אש"ל רימנוב, וואס שטייט בנשיאות הרב אברהם מנחם אדלער הי"ו פון די נאנטע מקורבים ביים רבי'ן.
פרייטאג אינדערפרי וועט דער רבי פוקד זיין די ציון הק' פונעם הייליגן רבי'ן ר' מענדעלע פון רימנוב זי"ע, און די ציון הק' פונעם הייליגן רבי'ן ר' הערש פון רימנוב זי"ע. זונטאג אינדערפרי וועט מען פוקד זיין דעם ציון הק' פונעם הייליגן רבי'ן ר' אלימלך זי"ע אין שטאט ליזענסק, און דערנאך וועט מען זיך ארויסלאזן אויפן וועג צוריק אהיים קיין ניו יארק.
