נאכפאלגענדיג די טרויעריגע אורטייל פון די ציוניסטישע בג"ץ אפצושטעלן שטיצע פאר די ישיבות הקדושות און כוללים לענגאויס ארץ ישראל, אויב די תלמידי הישיבות שטעלן זיך נישט צו צום גיוס געזעץ, האט כ"ק אדמו"ר מבעלזא שליט"א פאררופן א דריגענדע אסיפה מיט צענדליגע אנשי שם נגידים נכבדים פון אויסלאנד, צו דורכשמועסן דעם גאנצן ענין בכובד ראש, און אוועקשטעלן א יסוד איתן צו ווייטער קענען אנהאלטן די מוסדות התורה ווי ביז היינט.
די אסיפה איז געווען איינגעטיילט אין דריי לאקאציעס, בביתו נאוה קודש פונעם בעלזא רבי'ן אין ירושלים האבן זיך פארזאמלט די ראשי העסקנים און ראשי כוללים, אין שפיץ פון נכדו הגדול פון רבי'ן הרב שלום רוקח שליט"א, אין בארא פארק האבן זיך די נגידים צוזאמגענומען אין שטוב פון הנגיד ר' יהושע ענגל הי"ו, און אין מאנסי אין שטוב פון הנגיד ר' חיים דוד דייטש הי"ו.
דער פערזענליכער משב"ק פון כ"ק אדמו"ר מבעלזא שליט"א האט טעלעפאנירט בשליחות הקודש יעדן פערזענליך, און מחייב געווען צו זיין א טייל פון דעם ערנסטע אונטערנעמונג. דורך א לייוו הוקאפ האט מען מיטגעהאלטן אינאיינעם אלע דריי פלעצער, און הרה"ג ר' שלום רוקח שליט"א האט אויפגעטרעטן מיט די משא המרכזי, און פארלאנגט בשליחות הקודש פון די געטרייע תומכים צו ערפילן די לאך אינעם בודזשעט וואס פאסירט אצינד מיט די נייע געזעץ.
