מיט גרויס צער און טרויער האבן וויזניצע חסידים אומעטום אויפגענומען די שווערע בשורה איבער די פטירה בשיבה טובה פון הרב החסיד ר' יצחק שטערן ז"ל, לאנגיעריגער משגיח רוחני אין די וויזניצע ישיבות אין שיכון וויזניץ בני ברק און שיכון וויזניץ מאנסי.
ר' יצחק איז געווען א זעלטענע דמות פון א פארצייטישע חסידישע איד, מלא וגדוש בתורה וחסידות, ער האט פארקערפערט גאר אסאך אין זיך, און משפיע געווען פאר תלמידים און חסידים פון זיין רייכע קוואל, זייענדיג א דולה ומשקה מתורתן של רבותיו לאחרים.
געבוירן איז ער אין דער אלטער היים אין בוקאווינע, אלס יונגל האט ער מיטגעמאכט שווערע צייטן ביי די צווייטע וועלט מלחמה, זייענדיג פארוואגלט אין טראנסניסטריה לאגער, דארט איז ער קראנק געווען מיט טיפוס רח"ל, און מיט אפענע נסים האט ער איבערגעלעבט די מלחמה.
נאכן קריג איז ער אנגעקומען קיין ארץ ישראל וואו ער איז אריין לערנען אין די וויזניצע ישיבה, זייענדיג א תלמיד מובהק פון הרה"ק בעל אמרי חיים מוויזניץ זי"ע, ער האט גענאסן א קירבה יתירה ביים אמרי חיים, וועלכער האט אים פארבעטן צו זיין דער משגיח אין ישיבה, אנגעהויבן נאך אלס בחור, און שפעטער אויך אלס אינגערמאן.
שפעטער איז ער גערופן געווארן דורך כ"ק אדמו"ר הרה"ק מטאהש זי"ע ער זאל קומען דינען אלס משגיח אין ישיבה גדולה אין קרית טאהש, דארט האט ער געוואוינט פאר עטליכע יאר, ביז ער האט זיך געצויגן קיין מאנסי, און איז אויפגענומען געווארן אלס משגיח רוחני אין די וויזניצע ישיבה, תחת דגלו והדרכתו פון הרה"ק בעל תורת מרדכי מוויזניץ זי"ע.
ר' יצחק איז געווען באקאנט מיט זיין איידעלקייט און פשטות, קיינמאל נישט גערעדט קיין הויעך ווארט, נאר מיט א נאמנות געדינט זיין תפקיד, און מחנך געווען דורות נאמנים לה' ולתורתו. ער איז געווען זייער באליבט ביי פילע גדולי ישראל, די וויזניצע רביים הרה"ק בעל אמרי חיים, הרה"ק בעל ישועות משה, און הרה"ק בעל תורת מרדכי זי"ע. הרה"ק מסאטמאר זי"ע, הרה"ק מסקווירא זי"ע, הרה"ק מטאהש זי"ע, הרה"ק דער בית ישראל פון גור זי"ע, דער הייליגער חזון איש זי"ע, און דער הייליגער בריסקער רב זי"ע.
די לעצטע צענדליגע יארן איז ר' יצחק געווען פון די פני העדה אין וויזניץ, זייענדיג פון די עלטסטע חסידים אין מאנסי, און פאר די לעצטע פאר חדשים זינט די פטירה פונעם וויזניצער דיין זצ"ל, איז ער געווען דער סאמע עלטסטער מתפלל אין בית המדרש. ער איז אנגעגאנגען מיט א מורא'דיגע פרישקייט טראץ זיין פיזישע שוואכקייט, געקומען צום דאווענען און לערנען, מיטגעהאלטן די טישן בחצרות הקודש וויזניץ, און פארציילט פאר די יונגע חסידים וואס ער האט זוכה געווען מיטצולעבן ביי די פריערדיגע צדיקים.
כ"ק האחים האדמורי"ם שליט"א לבית וויזניץ האבן אלע אייניג ארויסגעוויזן א שטארקע שעצונג פאר ר' יצחק, זיי פלעגן נאכזאגן שיינע זאכן פון אים, זכרונות און סיפורים און דברי תורה, און געשפירט א זכיה צו קענען זיצן ביי איין טיש מיט דעם איש חסיד גדול בענקים.
די לעצטע צוויי וואכן איז ער ליידער געווען זייער נישט געזונט, און היינט דאנערשטאג פארטאגס איז ער נפטר געווארן אין עלטער פון 87 יאר, איבערלאזנדיג א הערליכע דור בליעה"ר, קינדער אייניקלעך, אור אייניקלעך, און אור אור אייניקלעך קע"ה. כמעט אלע זיינע קינדער זענען חשובע מרביצי תורה, תלמידי חכמים מגידי שיעור אין די וויזניצע ישיבות איבער גרעיטער ניו יארק.
די לוויה וועט פארקומען היינט נאכמיטאג זעקס אזייגער, פארנט פון וויזניצע בית המדרש אין מאנסי.
