היינט דאנערשטאג איז כ"ק אדמו"ר מוויזניץ שליט"א ארויסגעפארן ממעון קדשו אין קרית וויזניץ בני ברק, אויפן וועג קיין ניו יארק וואו דער רבי וועט פראווענען א געהויבענע שבת אינאיינעם מיט די נגידים ותומכים, תומכי ממלכת הקודש בנין הגדול בית וויזניץ אין קרית וויזניץ בני ברק, צו פארגרינגערן דעם שווערן עול וואס ליגט אויפן רבינ'ס פלייצעס אויסצוצאלן די חובות פון די מאסיווע בוי פראיעקט.
די גייסטרייכע שבת וועט פארקומען אין די פראכטפולע מלון רעזארט אין ניו דזשערזי, וואס געפונט זיך ארום א שעה צו פארן פון אלע חרדישע געגנטער לענגאויס ניו יארק און ניו דזשערזי, מטעם איגוד מוסדות וויזניץ און די געלונגענע שטאב פון עסקני הקהילה, ווערט אהערגעשטעלט א גאר רייכע פראגראם וואס וועט רייך מאכן דעם גאנצן שבת, און באגלייטן אלע באטייליגטע אויף לאנגע יארן.
די גאנצע שבת ווערט אהערגעשטעלט דורך די בארימטע אראנדזשירער ר' אלי' פריעדמאן הי"ו, א רייכע מוזיק קאפעליע אין לויף פון ערב שבת און מוצאי שבת, אנגעפירט דורך די וויזניצע בעלי מנגנים הרב מאיר אדלער, ר' יעקב יודא דאסקאל, און די לעגענדארע פאללאק ברידער פון מקהלת וויזניץ.
פרייטאג נאכמיטאג וועט פארקומען א אייגענארטיגע מעמד הדלקת הנרות אין שפיץ פון רבי'ן, וואו מען וועט אינאיינעם זאגן די תפילת השל"ה, שטייענדיג ערב שבת בעפאר ערב ראש חודש סיון וואס איז מסוגל צו דעם. דערנאך וועט זיין די פתיחת השבת דורכ'ן גאסט רעדנער הגה"צ אבד"ק לימינוב שליט"א, וועלכער וועט אויך משמיע זיין פייערדיגע דרשות ביי די סעודות שבת קודש.
דער וויזניצער רבי שליט"א וועט קידוש מאכן נאכן דאווענען, און שפעטער אריינקומען צום טיש ברוב עם הדרת מלך, וכמעשהו בראשונה וועט דער רבי שליט"א פראווענען א גייסטרייכע מעמד חלק ונחלה ביים קידוש שבת אינדערפרי, און די געהויבענע שלש סעודות מיט דברי תורה הכנה לחג מתן תורתינו.
ביים סעודת צפרא דשבתא וועט אויפטרעטן הרה"ג ר' אברהם סאלינסקי שליט"א אויף די ענגלישע שפראך, נאכמיטאג וועט פארקומען שיעורי תורה און א רייכע פראגראם אין די לאנגע נאכמיטאג שעות. שפעטער ביינאכט מוצאי שבת וועט זיין די געהויבענע מעמד הבדלה און ויתן לך, וואו מען וועט מתפלל זיין אינאיינעם מיטן רבי'ן לישועת הכלל והפרט.
ספעציעל איז ערווארטעט א חשובער גאסט כ"ק אדמו"ר מוויזניץ שליט"א פון ירושלים, וועלכער וועט קומען מיטהאלטן דעם גרויסן שבת בצל הקודש פון שאר בשרו דער וויזניצער רבי, און פראווענען אינאיינעם די תפילות און טישן אויף א געהויבענע פארנעם, בשבת בני אחים גם יחד.
