היינט איז ענדגילטיג באשטעטיגט געווארן אז מרן הגאון הגדול רבי משה הלל הירש שליט"א ראש ישיבת סלאבאדקע, וועט תיכף נאך יו"ט שבועות ארויספארן אויף א געהויבענע נסיעה קיין אמעריקע, מיטן ציהל אוועקצושטעלן א נייע קרן מיטן נאמען "עולם התורה", צו פינאנצירן די וועלט פון כוללים און ישיבות בארץ הקודש.
דער ראש ישיבה נעמט אונטער די נסיעה בטירחא דגופא ובטירחא דגברא רבא, נאך וואס אין די לעצטערע וואכן דראעט א שווערע גזירה אויף אחינו בני ישראל בארץ הקודש, ווען די מדינה וויל שניידן זייער שטיצע פאר די ישיבות און כוללים צוליב די גזירת הגיוס, וואס באדייט א שרעקליכע פינאנציעלע בראך פאר די הנהלת הישיבות והכוללים.
אצינד טוט דער ראש ישיבה אוועקשטעלן א נייע קרן "עולם התורה", און אויפטרייבן דערפאר סכומים אדירים פון די תומכי תורה אין פילע שטעט אין אמעריקע, צו העלפן פינאנצירן די ישיבות און כוללים בארץ הקודש, די תלמידי חכמים און אינגעלייט זאלן ווייטער קענען זיצן באהלה של תורה אן קיין גשמיות'דיגע שטער.
קומענדיגן זונטאג פרשת בהעלותך וועט דער ראש ישיבה ערשיינען אלס אורח הכבוד ביים גרויסארטיגן מעמד "אדירי התורה" שע"י ישיבה בית מדרש גבוה אין לעיקוואד, די מעמד קומט פאר צום דריטן יאר אין א רייע, ארויפצוהייבן די כבוד התורה און די שטיצע פון תומכי תורה, דער ראש ישיבה וועט אויפטרעטן מיטן משא המרכזי, און אזוי אויך איבערגעבן א שמועס אין די היכל הישיבה אין לעיקוואד.
