תושבי בארא פארק גרייטן זיך מיט התרגשות צום זעלטן געהויבענע מעמד וואס וועט פארקומען היינט אויפדערנאכט, ווען עס וועלן זיך צוזאמקומען טויזענטער תושבי העיר און פילצאליגע תלמידים ומעריצים פון די בארימטע סלאבאדקע ישיבה, צו מקבל פנים זיין בהדרת כבוד דעם חשובן גאסט פון ארץ ישראל, הגאון הגדול רבי משה הלל הירש שליט"א ראש ישיבת סלאבאדקע, און פון די פירנדע מנהיגים פון די יהדות החרדית בארץ הקודש.
דער ראש ישיבה שליט"א איז אנגעקומען אהער קיין אמעריקע פארלאפענע וואך, צו באשיינען א רייע כינוסים און מעמדים מיט די תלמידים ויוצאי הישיבה, די ערשטע וואך האט דער ראש ישיבה געוויילט אין לעיקוואד און אויפגעטרעטן מיט א רייע שיעורים בהיכלי הישיבות והכוללים.
היינט נאכט וועט געפראוועט ווערן א גרויסע מעמד קבלת פנים לכבודו אין הארץ פונעם עיר ואם בישראל בארא פארק, אין די נייע פראכטפולע זאל "אולם דוד שארף", וואו עס איז ערווארטעט א ריזן ציבור פון נאנט און ווייט ארויסצוצייגן דעם כבוד התורה מיט אירע שענסטע קאלירן, דער ראש ישיבה וועט משמיע זיין דברי ברכה לכל העם הנאספים, און א ספעציעלע שמועס וועט מען הערן דורך א לייוו הוקאפ, פון ידידו ורעו הגאון הגדול רבי דוב לאנדא שליט"א ראש ישיבת סלאבאדקע, ממעון תורתו אינעם עיר התורה בני ברק.
די מעמד וועט באגלייט ווערן בשירה וזמרה לכבודה של תורה, דורך די בארימטע וויזניצע קאפעליע און טאלאנטפולע בעלי מנגנים, אלס נואם הכבוד וועט אויפטרעטן הגאון הגדול רבי אלי' בראדני שליט"א ראש ישיבת מיר, און דורכאויס די מעמד וועט זיין א געלעגנהייט צו באשטעלן אן אוידיענץ אריינצוגיין בצילא דמהימנותא זיך דורכרעדן מיטן ראש ישיבה און נהנה זיין עצה ותושיה.
