דאס יהדות החרדית אין ניו יארק און ניו דזשערזי נעמט אויף מיט גרויס פרייד און התרגשות די בשורה טובה פון ארץ ישראל, אז הנה מלכך בא בעוד שבועיים, ווען די אמעריקאנער אידנטום וועט האבן די זכיה צו מקבל זיין את פני הדרת כבודו פונעם זקן ראשי הישיבות בארה"ק, הגאון הגדול רבי משה הלל הירש שליט"א ראש ישיבת סלאבאדקע, וועלכער איז ערווארטעט צו דערגרייכן די ניו יארקער האפן אין צוויי וואכן ארום פאר א לענגערע באזוך.
דער ראש ישיבה וועלכער איז פארנומען צו מרביץ תורה זיין פאר תלמידים דורכאויס דעם גאנץ קיילעכיגן יאר, זייענדיג עוסק ויושב בישיבה אין די בארימטע סלאבאדקע ישיבה אימפעריע בעיר התורה בני ברק, נעמט אונטער דעם לאנגן רייזע אויפצוטרייבן שטיצע ביי נדיבים בעם, וואס ווארטן ארויסצוהעלפן דעם ראש ישיבה טראגן דעם שווערן עול צו דעקן די פינאנציעלע בודזשעט פון די ישיבה.
איבערהויפט שטייגט די התרגשות ביי די הונדערטער תלמידים ומעריצים, יוצאי ישיבת סלאבאדקע פון איבער גרעיטער ניו יארק און ניו דזשערזי, ווען מ'וועט האבן די זכיה לחסות בצל אורו הגדול, און זיך ווארעמען ביים קלאמקע פונעם ראש ישיבה, אויפברענגען זכרונות הוד און ווידער פארברענגען מיטן ראש ישיבה וועלכער איז באקאנט אנצוהאלטן א זעלטן נאנטע קשר מיט יעדן תלמיד הישיבה אויך אויף יארן שפעטער.
דער ראש ישיבה וועט גרייכן די ניו יארקער האפן קומענדיגן דינסטאג פרשת ויצא ה' כסלו, און פארוויילן דאהי פאר א לענגערע באזוך פון צוויי וואכן, עס וועט פארקומען א רייע מסיבות און מעמדים וואו דער ראש ישיבה וועט איבערגעבן טיפזיניגע שיעורים און זיך טרעפן מיט די הונדערטער תלמידים, א געלונגענע סוויטע פון עסקנים באגלייטן דעם גאנצן נסיעה צו פארזיכערן די מאקסימום הצלחה, און ארבעטן אצינד אויס די גענויע דעטאלן פון דעם ביקור המרומם.
