חסידי באבוב תושבי לינדען נעמען אויף מיט פרייד די ערנסטע פארשריט פון הרחבת גבולי הקדושה, ווען עס איז געמאלדן געווארן אז צום נייעם לערן יאר תשפ"ה וועט די באבובער מוסדות אין לינדען ווערן אוועקגעשטעלט אויף א שטאנדהאפטיגע פארנעם, און וועט פארמאגן קלאסן פאר די יונגערע קינדער ביז ארויף צו כתה ג'.
אין די לעצטע עטליכע יאר זינט באבובער חסידים האבן זיך אנגעהויבן באזעצן אין שטאט לינדען, איז געגרינדעט געווארן די מוסדות בלויז פאר די פרי סקול קלאסן, סיי פאר די אינגלעך און סיי פאר די מיידלעך, און היינט צוטאגס ווען די צאל חסידים תושבי העיר איז שטארק געוואקסן בליעה"ר, גרייט מען זיך צו עפענען די קלאסן ביז ארויף צו כתה ג', סיי פאר די אינגלעך אין ראם פון ישיבת באבוב בני ציון, און סיי פאר די מיידלעך אין ראם פון בנות ציון ד'באבוב.
בהוראת הקודש פון כ"ק אדמו"ר מבאבוב שליט"א איז אוועקגעשטעלט געווארן א ספעציעלע וועד הרוחני פון דריי חשובע אינגעלייט וואס וועלן שטיין אין שפיץ פון אלע אנגעלעגנהייטן אין די מוסדות, אונטער די השפעה פון די צענטראלע וועד הרוחני פון מוסדות באבוב אין בארא פארק. אזוי אויך האט מען אצינד אויפגענומען פרישע מלמדים און מרביצי תורה, א מנהל פאר די תלמוד תורה, א מנהלת פאר די מיידל שולע פאר לימודי קודש, און א מנהלת פאר די מיידל שולע פאר לימודי חול, און אזוי ווייטער.
דאס קומט בלויז א קורצע צייט נאך וואס די מוסדות אין לינדען האט אפגעקויפט א ריזן צענטראלע בנין פאר די בית המדרש הגדול און מוסדות באבוב, וואו עס וועלן נתחנך ווערן די לעכטיגע קינדערלעך מיט ישוב הדעת און מנוחת הנפש.
