מטעם קהל יטב לב ד'סאטמאר איז געמאלדן געווארן די איבערראשנדע נייעס, אז די גרויסארטיגע יארצייט טיש סעודת הילולא וסיום הש"ס ביום כ"ו אב, הילולת הרה"ק מסאטמאר זי"ע מייסד הקהילה, וועט פארקומען אויף א גרויסע פארנעם אין די נייע ריזן היכל בית המדרש "היכל אלטר יחזקאל" בבנין ביהמ"ד הגדול בנין אליהו אין קרית יואל, וואס איז אצינד אין סאמע ברען פון א מאסיווע בוי פראיעקט.
די בוי ארבעט אהערצושטעלן דעם ריזן נייעם היכל גייט שוין אן פאר עטליכע וואכן אין פולן שוואונג, אין די לעצטערע טעג איז פארענדיגט געווארן די דרויסענדיגע געבוי מיט די שטאלענע ביעמס, וואס טוט ערמעגליכן צו איבערדעקן דעם היכל אויף צייטווייליג, און אפרעכטן דארט די גרויסארטיגע יארצייט טיש סמוך ונראה צום ציון קודש הקדשים פונעם בעל ההילולא.
די נייע היכל וועט בלייבן איינגערישט ביז איבער שבת, ווען כ"ק אדמו"ר מסאטמאר שליט"א וועט פראווענען א געהויבענע שבת בקרב חסידיו תושבי קרית יואל, ווי איינגעפירט יעדעס יאר אויף שבת מברכים חודש אלול, ווען א טייל חסידים געפונען זיך נאך אויף די קאנטרי בערג, און א טייל זענען שוין צוריק אין שטאט.
אין די זעלבע צייט גייט אן די בוי ארבעט אויף א שנעלן טעמפא, צו פולקאם פארענדיגן דעם בנין כלול בהדרו לקראת די הייליגע טעג הממשמשים ובאים. אזוי אויך האט מען שוין אנגעהויבן די דעמאלישונג פראצעדור אויף א גרויס טייל פון די ערשטע שטאק, וואו עס ווערט איינגערישט די נייע דאווענען שטיבלעך צו קענען ארייננעמען צענדליגע מנינים אין א קורצע צייט אפשניט, לרווחת הציבור תלמידי וחסידי סאטמאר תושבי העיר.
