נאך עטליכע וואכן וואס כ"ק אדמו"ר מקאסוב שליט"א האט זיך אויפגעהאלטן אין ארץ ישראל, במקום מושבו ביזן איבערנעמען די כתר האדמורו"ת, גרייטן זיך חסידי קאסוב צו מקבל זיין את פני הקודש ווען דער רבי ציהט זיך ענדגילטיג אריבער קיין אמעריקע אנצופירן די קהילה און די עדה הקדושה במקום אביו הגדול, צום טיפן פרייד און התרגשות פון כלל חסידי קאסוב וואס קוקן ארויס אויף דעם מאמענט, זיך צו קענען דערווארעמען לאורו הגדול און נהנה זיין עצה ותושיה, בדרך אביו הגדול דער אומפארגעסליכער רבי זכר צדיק לברכה.
דער רבי שליט"א וועט לאנדן אין די נוארק לופטפעלד היינט נאכמיטאג ארום 5:45, א ריזן ציבור חסידים זענען ערווארטעט ארויסצופארן צום לופטפעלד מקבל זיין את פני הקודש בכבוד מלכות. שפעטער אויפדערנאכט א פערטל צו צען וועט דער רבי אריינקומען אויף תפילת מעריב אין קאסובער בית המדרש אין בארא פארק ברוב עם הדרת מלך, וואו נאכן דאווענען וועלן די חסידים אריבערגיין שלום נעמען ביים רבי'ן, און עס וועט פארקומען א גרויסע מעמד קבלת פנים לכבודו במעמד קהל רב.
דעם שבת פרשת עקב וועט דער רבי פראווענען אויף א פארמאכטע פארנעם מחוץ לעיר, און קומענדיגע וואך פרשת ראה שבת מברכים חודש אלול וועט דער רבי פראווענען ברוב עם הדרת מלך אינעם עיר ואם בישראל בארא פארק.
