די גאסן אין קרית טאהש ווירבלען מיט הכנות אין בעפארברייטונג צום גרויסן שבת יארצייט דעם שבת קודש פרשת ראה ז"ך אב, ווען עס געפאלט די ניינטע הילולא קדישא פון הרה"ק מטאהש זי"ע בעצם יום השבת, און פילע חסידים קומען צו פארן פון נאנט און ווייט צו וויילן בצל הקודש פון בנו ממלא מקומו כ"ק אדמו"ר מטאהש שליט"א.
דער רבי שליט"א וועט ארויפגיין צום ציון הק' פרייטאג פארמיטאג אינאיינעם מיט פילע חסידים און תלמידי הישיבה, און כנהוג אויסזאגן גאנץ ספר תהלים בהתעוררות רב להיפקד בדבר ישועה ורחמים. מוצאי שבת וועט דער רבי אפרעכטן די צענטראלע יארצייט טיש ברוב עם הדרת מלך אין ביהמ"ד הגדול.
מטעם וועד האש"ל אין טאהשער שטעטל ווערט צוגעגרייט אש"ל מלא פאר אלע געסט, סעודות שבת קודש אין די זאל פון בית צירל, און אזוי אויך צו שלאפן דורכאויס די ימי ההילולא. אזוי אויך וועט זיין א פולקאמע טראנספארטאציע סיסטעם אין שטעטל צו פירן דעם ציבור צום ציון אהין און צוריק, דורכאויס דאנערשטאג, פרייטאג, און זונטאג.
שבת אינדערפרי וועט כ"ק אדמו"ר מטאהש שליט"א פירן שולחנו הטהור אינאיינעם מיט די חשובע אורחים אין זאל פון בית צירל.
א ספעציעלע מעמד געאייגענט פאר די בחורי חמד וועט פארקומען ערב שבת נאכמיטאג א קורצע צייט בעפארן זמן הדלקת הנרות, עס וועט פארקומען א ספעציעלע סדר לימוד, און כ"ק אדמו"ר מטאהש שליט"א וועט משמיע זיין דברות קודש ספעציעל פאר די חשובע בחורים. דאן וועט דער רבי אנצינדן די שבת ליכט אין ביהמ"ד בהתעוררות רב, נאכגעפאלגט מיט אמירת שיר השירים ברוב עם הדרת מלך.
