תלמידי וחסידי סאטמאר די בכל אתר ואתר נעמען אויף מיט איבערראשונג די פרייליכע מעלדונג פון די סאטמארע מוסדות אין וויליאמסבורג, איבער א היסטארישע כנסיה לשם שמים וואס וועט צונויפברענגען אלפי חסידים ואנשי מעשה אויף אן ערשטמאליגע פארנעם, דעם קומענדיגן כ"א כסלו תשפ"ה, יובל השמונים צום יום הצלה והשחרור פון הרה"ק מסאטמאר זי"ע מגיא צלמות.
די היסטארישע דערגרייכונג פון אכציג יאר זינט די נס ההצלה, איז א פאקט וואס וועקט אויף נאסטאלגישע זכרונות און הרגשים ביי תלמידי וחסידי סאטמאר, זעענדיג ווי די מעכטיגע אימפעריע אינערהאלב קהילות ומוסדות סאטמאר בליהט און וואקסט אויף א זעלטענע פארנעם, איבערהויפט די מוסדות הקדושים אין וויליאמסבורג וואס וואקסט מיט יעדע פארבייגייענדע טאג, און יעצט ווען מ'גרייט זיך צו פראקלאמירן א מאסיווע פופציג מיליאן דאללערדיגע קאמפיין צו פארזיכערן די עתיד פון די מוסדות הקדושים, צו קענען פינאנצירן די פילצאליגע בוי פראיעקטן אינערהאלב די בניני המוסדות אין וויליאמסבורג.
די גרויסע חגיגה כינוס תלמידי וחסידי סאטמאר וועט פארקומען זונטאג פרשת מקץ אינעם גרויסן טאג פון כ"א כסלו, ווען כולם יקבצו ויבואו זיך מיטצופרייען מיט די פאראייניגטע שמחה, און צוזאמען אוועקשטעלן א יסוד איתן פאר די ווייטערדיגע הצלחה פון די מוסדות הקדושים, מיסודו פונעם בעל הנס הרה"ק מסאטמאר זי"ע.
די גיגאנטישע בארקלעיס צענטער סטעדיום אין ברוקלין ניו יארק, איז ארויסגעדינגען געווארן אלס פאסיגע אכסניא פארן גרויסארטיגן מעמד, און די עסקני הקהילה והמוסדות, אין צוזאמענארבעט פון די בארימטע YF פראדאקשענס זענען שוין היבש אקטיוו אויסצוארבעטן די גענויע פלענער, א באזוך אין בארקלעיס צענטער צו זעהן די פלאץ פונדערנאנט איז שוין אפגעהאלטן געווארן פארלאפענע וואך, און כסדר קומען פאר פרישע זיצונגען און באראטונגען צווישן די עסקנים אין די צייט וואס די יום הגדול דערנענטערט זיך.
