אין די צייט וואס די בוי ארבעט ביים נייעם בנין בית רחל פון מוסדות סאטמאר אין בארא פארק גייט אן אין פולן שוואונג, האט זיך היינט אפגעשפילט א היסטארישע מאמענט ווען דער בארימטער נדבן און תומך תורה הנגיד החסיד ר' ליפא פריעדמאן הי"ו האט זיך אונטערגענומען צו געבן פרישע פינף מיליאן דאללער, און דערמיט אפקויפן דעם זכות שם הבנין.
די בית רחל געביידע ווערט געבויעט אויף די פערצנטע עוועניו ביי די נידריגע זעכציגער גאסן אין בארא פארק, מען שטייט נאך ווייניגער ווי א יאר זינט מען האט אנגעהויבן בויען דעם בנין, און מען גרייט זיך שוין בקרוב צו פארענדיגן די געביידע כלול בהדרו, צום בעפארשטייענדן יו"ט חנוכה הבעל"ט.
היינט מיטאג ביי א רייכע מסיבה אינאיינעם מיט די נדיבים ותומכים פון מוסדות סאטמאר אין בארא פארק, אין שפיץ פון כ"ק אדמו"ר מסאטמאר שליט"א ובנו הגה"צ אב"ד סיגעט שליט"א וועלכער שטייט בראש המוסדות, האט הנגיד החסיד ר' ליפא פריעדמאן געמאלדן זיין פרישע נדבה פון פינף מיליאן דאללער אפצוקויפן דעם שם הבנין, נאכפאלגענדיג די פינף מיליאן דאללערדיגע נדבה פארן בנין הת"ת החדש אין בארא פארק בנין ליפא פריעדמאן, און נאך א רייע ריזיגע נדבות וואס ער האט זיך געלאזט קאסטן אין די לעצטע תקופה.
די מסיבה איז פארגעקומען אין שטוב פון הנגיד הנכבד ר' אברהם משה ווערצבערגער הי"ו שווער פון ר' ליפא, און די נאמען פאר די בנין הבית רחל וועט גערופן ווערן אויפן נאמען פון הרה"ח ר' משה פריעדמאן הי"ו לעגענדארער משמש בקודש אין סאטמאר פאטער פון ר' ליפא, און לכבודו פון זיין שווער ר' אברהם משה ווערצבערגער הי"ו.
