מוסדות סאַטמאַר קרית יואל איז במשך די לעצטע עטליכע יאר אויסגעשטיגן אַלס א ריזיגע אימפעריע פון תורה ויראה, און אַ שטאלץ פאר סאַטמאַר איבער דער גאָרער וועלט, וואס פון איבעראל קוקט מען אויף דעם ארויף.
טראץ די שוועריגקייטן אין די ערשטע יאָרן, האט זיך די מוסדות ב"ה סטאביליזירט מיט בערך פינף יאר צוריק, מיטן ווערן אוועקגעשטעלט אויף געזונטע שטאנהאפטיגע יסודות בסייעתא דשמיא, ווען עס ווערן באצאלט פעיראָל אין צייט, וואָך איין וואָך אויס, פאר די קרוב צו 600 איינגעשטעלטע, מחנכים ומחנכות, מרביצי תורה וכלי קודש.
אין די יעצטיגע טעג ווערט פארענדיגט מיט פראַכט דעם נייעם הערליכן בנין הבית רחל – בנין גאָלדבערגער, וואס שטייט שוין ב״ה בנוי לתלפּיות לשם ולתפארת, און הייבט זיך ארויס מיט אירע פינף מלכות׳דיגע שטאָקן אויף הונדערט טויזנט סקווער פיס, אלס בנין אדיר ומפואר. דער קלאָרער פאַקט ווייזט אז אנגעהויבן די לעצטע עטליכע יאר איז מוסדות קרית יואל ״די שנעלסט-וואקסנדע סאטמארער מוסדות״ איבער דער גאָרער וועלט! די מוסדות וואקסט יעדעס יאר מיט ארום 700 נייע קינדער בליעה"ר! אן אסטראנאמישער ציפער וואס פירט דערצו אַז ס׳נישטאָ קיין איין אפּטיילונג אדער סניף פון די מוסדות וואו מען מוז נישט נאכאנאנד בויען און פארברייטערן.
די הנהלת המוסדות זיצט נישט מיט פארלייגטע הענט, מען האט שוין אין "די לעצטע 5 יאר אינוועסטירט גאנצע 70 מיליאן דאללאר פאר די קרן הבנינים", און מען בויעט ווייטער נאך עטליכע פרעכטיגע בניני המוסדות ביתר שאת ועוז! לויטן חשבון וועלן די בניני המוסדות אין די קומענדיגע עטליכע יאר זיך ציילן צו גאנצע 15 בנינים אדירים לשם ולתפארת, אבער מען מוז האבן די הילף פון יעדעם איינעם צו קענען אנקומען דערצו בסייעתא דשמיא.
דער פאקט אז די געטרייע הנהלת המוסדות שלעפט אזא שווערע עול, סיי מיט דעם ריזן טעגליכן בודזשעט און סיי דעם גרויסן יאָך פון די אנגעזאמעלטע חובות פון די פריערדיגע יארן ביים התייסדות המוסדות – וואס די געטרייע הנהלה צאלט אָפ ריזיגע פעימענטס מדי חודש בחודשו – ברענגט צו דעם אז עס איז פשוט נישט מעגליך צו קענען באַנייען דעם יעצטיגן בנין הבית רחל מיט פרישע חובות!
די יעצטיגע קאמפיין ״אדיר וחזק״ איז נישט בלויז דער עתיד פון קרית יואל — נאר דער עתיד פון גאנץ סאטמאר! דער עתיד פון די דורות העתידים אינערהאלב קהילת ומוסדות סאטמאר אין קרית יואל.
מ׳מוז יעצט באנייען דעם ״בית רחל האדיר החדש - בנין גאלדבערגער״, און דערנאך שפּאנען פאראויס צו בויען נאך און נאך בלי הרף, ווייל ״מען מוז״ עס האָבן פאַר׳ן וואוקס פון קרית יואל, פאַר׳ן וואוקס פון סאַטמאַר. די הנהלת המוסדות קומט ארויס אצינד מיט א הייסע ביטע צו כלל ישראל; קומט אנטקעגן די מוסדות מיט ווארעמע שטיצע, און העלפן ערמעגליכן אַן עתיד פון בלי און וואוקס בסייעתא דשמיא!
העלפטס קרית יואל - די שפּיגעלע פון סאַטמאַר! קרית יואל האט געבויעט! קרית יואל וועט אי״ה בויען! לאָמיר ענדיגן 'יעצט' דעם בית רחל!
