שטייענדיג בלויז צוויי און א האלב יאר זינט די סאטמארע בית המדרש אין ניי וויליאמסבורג ביים ווינקל פון מארסי און ווערנאן איז געעפנט געווארן, איז דעם שבת קודש געמאלדן געווארן די פרייליכע אנטוויקלונג אינערהאלב די הרחבת גבולי הקדושה אין בית המדרש, אז די הנהלת הקהילה איז אריין אין קאנטראקט אפצוקויפן נאך צוויי בנינים צו פארברייטערן די ביהמ"ד אויף א שטארקע פארנעם.
די סאטמארע בית המדרש וואס געפונט זיך ביים ווינקל פון מארסי עוועניו און ווערנאן עוועניו, איז געעפנט געווארן יו"ט פסח תשפ"ב, אונטער די פירערשאפט פונעם דיין הקהילה הרה"ג ר' יהוסף שווארץ שליט"א. זינט דאן איז שטארק געשטיגן די צאל מתפללים וואס שטופט די הנהלת הקהילה צו פארברייטערן דעם בית המדרש, און אזוי אויך זעהט זיך אן די נויט צו עפענען דעם בית המדרש אויך פאר די וואכן טעג, פאר מנינים צום דאווענען און שיעורי תורה.
דעם פרייטאג צונאכטס בעפאר קבלת שבת איז געמאלדן געווארן די פרייליכע נייעס אז די הנהלת הקהילה איז אריין אין קאנטראקט אפצוקויפן צוויי געביידעס הארט נעבן די יעצטיגע בית המדרש, וואס וועט ווערן פראכטפול אויפגעבויעט מיט א נייעם גרויסן לופטיגן היכל ביהמ"ד, א פראכטפולע מקוה און שטיבלעך צום דאווענען, און אלע באדערפענישן וואס פעלט זיך אויס פאר א קהילה נאה וחסידה.
