היינט זונטאג איז כ"ק אדמו"ר מקרעטשניף ירושלים שליט"א ארויסגעפארן אויף א לענגערע נסיעה קיין אייראפע, לפאר על ראש שמחתו ביי די שמחת החתונה פון א אייניקל, וואס קומט פאר דעם קומענדיגן מיטוואך אין שטאט אנטווערפן.
די חתן איז א זון פונעם רבינ'ס איידעם הגה"צ ר' דוד צבי הירש מייזליש שליט"א, זון פון הגה"צ ר' בעריש מייזליש שליט"א מווייטצען לאנדאן, די כלה איז א טאכטער פון הגה"צ ר' אלעזר פריעדמאן שליט"א דיין אין די סאטמארע קהילה אין אנטווערפן, זון פון הגה"צ ר' ברוך אברהם פריעדמאן שליט"א דומ"ץ סאטמאר העריסאן, און איידעם ביי כ"ק אדמו"ר מפשעווארסק שליט"א. די שמחת החתונה קומט פאר בצל הקודש פונעם גרויסן זיידן כ"ק אדמו"ר מפשעווארסק שליט"א.
היינט זונטאג אויפדערנאכט אין אייראפע, האט דער רבי שליט"א געלאנדעט אין אמסטערדאם, און פון דארט צוגעפארן קיין אנטווערפן בעלגיע, וואו דער רבי וועט זיין צוגאסט די קומענדיגע טעג, בבית האכסניא אין שטוב פון הרב החסיד ר' חיים יאקאב ז"ל מחשובי חסידי קרעטשניף אין שטאט.
קומענדיגן דאנערשטאג ממחרת החתונה וועט דער רבי שליט"א פארזעצן די נסיעה קיין לאנדאן, און נישט פארבלייבן אויף שבת שבע ברכות וואס קומט פאר בחצר הקודש פשעווארסק אין אנטווערפן. דער רבי שליט"א וועט פראווענען א געהויבענע שבת אין שטאט לאנדאן בקרב חסידיו ומעריציו, אין די גרויסע וועניו זאל אין שטאט. די אכסניא וועט זיין אין שטוב פון הרב החסיד ר' נפתלי אלימלך שטערן הי"ו.
מאנטאג אויפדערנאכט וועט פארקומען א גרויסע שבע ברכות צוגעשטעלט דורכ'ן רבי'ן, לכבוד די שמחת החתונה בחצר הקודש. די שבע ברכות וועט פארקומען אין די פרדס וויזניץ זאל אין לאנדאן, מיט די באטייליגונג פון פילע חסידים ומעריצים לבית קרעטשניף פון אייראפע.
